Xəbər verdiyimiz kimi, martın 29-u axşam saatlarında Milli Məclisin deputatı Fazil Mustafa qarşı sui-qəsd olub. O, evinin yaxınlığında ayaq və çiyin nahiyəsindən güllələnib.
Məsələ ilə bağlı deputatlar Ednews-a öz fikirlərini bölüşüblər.
“Fazil Mustafa Azərbaycanın görkəmli ziyalılarından fəal deputatlarından biridir. Hadisələrə orjinal münasibəti olan bir insandır. Cəmiyyətlə bağlı olan bütün xəbərlərə münasibət bildirən biri olub. Baş verən hadisənin köklərini axtarıb tapmaq mürəkkəb məsələdir. Amma hər halda bu Azərbaycandan kənardan gəlir. Fazil Mustafaya qarşı belə bir terror hadisəsi törədən şəxs Azərbaycandan ola bilməz”.
Bu sözləri Ednews-a açıqlamasında deputat Sabir Rüstəmxanlı bildirib.
“Bu məsələni həqiqətən pisləyirəm. Bizim millət belə namərd deyil. Bu əsl terror hadisəsidir, qəsddir. Bu hadisənin araşdırılması üçün hüquq mühafizə orqanları çalışırlar. Bütün bunlar üzə çıxmayana kimi fikir bildirmək əslində çətindir. Bu kimi halların baş verməsinə yol vermək olmaz. Bu məsələ araşdırılmalı və hansı qruplaşma tərəfindən törədildiyi üzə çıxmalıdır”.
Deputat bildirib ki, F.Mustafa İrandakı terror hadisəsi ilə bağlı bir çox tənqidi fikilər səsləndirib.
“Buna əvəz olaraq da bu terrror törədilə bilər. Bəlkə bu qəsdən törədilib ki, Azərbaycan və İran arasında olan münasibətlər daha da gərginləşsin. Bu araşdırılmalı, cinayətkarlar öz cəzasını tapmalıdırlar”.
Deputat Musa Quliyev isə həmkarına qarşı törədilən sui-qəsdi ictimai-siyasi dövlət adamına qarşı törədilən cinayət adlandırıb.
“Bu həm də Azərbaycan dövlətinə qarşı törədilən cinayətdir. Cəmiyyətdə sabitliyin pozulmasına yönələn bir cəhddir. Eyni zamanda Azərbaycanda ictimai sabitliyi asayişi təhdid edən bir addımdır. Biz baş verən bu addımı qətiyyətlə pisləyirik. Hansı qüvvələrin burada əli olmasını şübhəsiz ki, hüquq-mühafizə orqanları araşdırıb rəsmi məlumat verəndən sonra biləcəyik”.
Deputat qeyd edib ki, burada hansı təşkilatın və yaxud hansı şəxsin əlinin olmasını əlimizdə tutarlı səbəb olmadan söyləmək mümkün deyil.
“ Aydındır ki, bu Fazil Mustafanın ictimai-siyasi fəaliyyəti ilə bağlıdır. O cümlədən sosial şəbəkələrdəki yazıları ilə bağlı ola bilər. Arzu edirik ki,tez bitr zamanda bu terroru törədənlər öz cəzasını alacaq. Hər kəs bilməlidir ki,Azərbaycan güclü dövlətdir və onun dövlətçiliyinə qarşı edilən bütün təhdidlərə qarşı cavab vermək iqtidarındadır”
Ayan Rzayeva
