Mərakeş Krallığının Azərbaycandakı fövqəladə və səlahiyyətli səfiri Məhəmməd Adil Embarş Beynəlxalq Avrasiya Mətbuat Fondunun prezidenti Umud Mirzəyevə telefonla zəng vurub.
Ednews-un verdiyi xəbərə görə, cənab Adil Embarş 26 aprel Tərtər rayonunun Suqovuşan kəndi istiqamətində minalardan təmizlənməmiş ərazidə BAMF-ın İcma Mina Aksiyası komandasının sürücüsü, 1990-cı il təvəllüdlü Babaşov Xəzər Tarıyel oğlu minaya düşərək xəsarət alması hadisəsi ilə bağlı təəssüf hisslərini U.Mirzəyevə bildirib.
O, hadisədən kədərləndiyini ifadə edib:
“Xəbəri eşidəndə çox üzüldüm. Mina ilə bağlı problem Azərbaycan üçün çox ciddi məsələdir. Əməkdaşınız Xəzər bəyə Allahdan şəfa diləyirəm. Ümid edirəm ki, bir daha bu cür hadisələr sizdən uzaq olar.”
U.Mirzəyev səfirə zəngi üçün təşəkkür edib və mina probleminin nə dərəcədə ağır məsələ olduğunu bildirib:
"Azərbaycanın ərazisi mina çirklənməsi ilə bağlı ağır vəziyyətdədir. ANAMA tərəfindən regionda Mina Təhlükəsi ilə Mübarizə Proqramı üzrə fəaliyyətlər aktiv şəkildə davam etdirilir. Mina problemi ölkəmizin ən vacib həll olunması məsələlərindəndir ".
Xatırladaq ki, 2020-ci ilin 10 noyabr razılaşması ilə döyüş əməliyyatları dayandırılandan bu günə qədər Ermənistan silahlı qüvvələrinin basdırdıqları minaların partlaması nəticəsində hərbi qulluqçu və mülki şəxs olmaqla ümumilikdə 295 nəfər mina qurbanlarından 51 nəfər həlak olub, 244 nəfər isə müxtəlif dərəcəli bədən xəsarətləri alıb.
Oğuz