Udmurtiyada “DOSTLUQ” Azərbaycan İctimai Mərkəzinin Regional İctimai Təşkilatının hesabat-seçki yığıncağı keçirilib

Mayın 4-də Udmurtiya Respublikasının Xalqlar Dostluğu Evində “DOSTLUQ” Azərbaycan İctimai Mərkəzinin Regional İctimai Təşkilatının hesabat-seçki yığıncağı keçirilib.

İclasda 5 il ərzində görülmüş layihələrin hesabatı verilib və yeni prespektivlər müzakirə edilib.

Qurumun sədri Zülfüqar Mirzəyev qurumun ötən dövr ərzində fəaliyyəti haqqında hesabat məruzəsi ilə çıxış edib. O, qeyd edib ki, Azərbaycan diasporu xeyriyyəçilik fəaliyyətinə xüsusi diqqət yetirir, respublikanın ictimai həyatında fəal iştirak edir və Udmurtiyanın inkişafına mühüm töhfə verir. 

“Adət-ənənələrin qorunub saxlanması, mədəniyyətin inkişaf etdirilməsi, ana dilinin öyrənilməsi məqsədilə “Bayram Hümbətov” adına 2016-cı ildən “Bazar günü məktəbi” fəaliyyətini davam etdirir və burada uşaqlarımız öz ana dilində pulsuz əlavə təhsil alırlar. Hər il sizinlə birlikdə milli və dini bayramlarımızı, qeyd edirik. Millətlərarası idman tədbirlərinin təşəbbüskarıyıq: “Dama və nərd turniri”, “ Nə? Harada? Nə vaxt?” Çempionatı, eləcə də SSRİ Xalq Artisti Müslüm Maqomayevin xatirəsinə həsr olunmuş “Sən mənim melodiyamsan” vokal festivalına müraciətlər qəbul olunur”.

Tədbirdə həmçinin sabiq Daxili İşlər Naziri Tofiq Kərimovun xatirəsinə ucaldılmış xatirə lövhəsinin açılışı olub. 

Eyni zamanda tədbirdə ötən müddət ərzində Udmurtiyanın biznes, təhsil müəssisələri nümayəndələrinin Azərbaycana səfəri təşkil olunub. Universitetlərarası memorandumlar və Azərbaycandakı rus icması ilə müqavilə imzalanması da yada salınıb. 

Udmurtiya Respublikasının milli siyasət naziri Eduard Petrov, Udmurtiya Xalqlar Assambleyasının sədri Vladimir Baimetov və Xalqlar Dostluğu Evinin direktoru Yuliya Şaxtinanın çıxışlarında ümumtəhsil sahəsində görülən işlərdən danışılıb. 

Tədbirdə İdarə Heyətinin, Ağsaqqallar Şurasının və Təftiş Komissiyasının yeni tərkibi yenidən seçilib və “Gənclər Şurası “ yaradılıb.

İdarə Heyətinin yekdil qərarı ilə Mirzəyev Zülfüqar Rəhim oğlu yenidən diaspor sədri seçilib. O, etimada görə iştirak edənlərə təşəkkür edib və həmkarlarını əmin edib ki, ana dilinin və milli mədəniyyətimizin inkişafı üçün əlverişli şərait bundan sonra da qorunacaq. Yeni beynəlxalq layihələr hazırlanacaq və həyata keçiriləcək.