Günümüzdə gənc ailələrin aktual problemlərindən biri də ünsiyyət qura bilməməkdir. Gənc cütlüklər arasında ünsiyyət problemi ailə bağlarını zədələyir, gələcəkdə boşanmalara qədər gətirib çıxarır. Ünsiyyətin olmaması gənclərin cinsi münasibətləri müzakirə etməsini, bu barədə danışmasını, demək olar ki, mümkünsüz edir. Bu daha sonra ailədə dünyaya gələcək körpənin sağlamlığı və qadının reproduktiv sağlamlığına da təsirsiz ötüşmür.
“Azərbaycanda ailələrin böyük əksəriyyəti valideyn tövsiyəsilə qurulur. Ailə qurmağa hazırlaşan iki gənc arasında sevgi, qarşılıqlı hörmət, anlayış olmalıdır. Valideyn bu nüansları gözardı edərək övladını özü istədiyi bir ailənin qızı və ya oğlu ilə ailə qumağa məcbur edir. Elə şərtlər qoyur ki, övlad məcbur olub istəmədiyi şəxslə həyatını birləşdirir. Anlaşılmazlıq, yalanlar, xəyanətlər, boşanmalar ən çox belə ailələr üçün spesifikdir”.
Bu fikirləri Ednews-a açıqlamasında cinsi münasibətlərin müzakirəsinin əhəmiyyətindən danışan psixoloq Gülnar Orucova bildirib. O qeyd edib ki, aşağı yaşlardan etibarən yeniyetmələrə, uşaqlara cinsi tərbiyə verilməlidir.
“Ancaq görürük ki, uşaqlar bu barədə valideynlərinə sual verəndə belə danlaq eşidir - ”pis söz danışma”, “tərbiyəsizlik etmə”, “bir də belə sözlər işlətmə” və s... Valideyn uşağın cinsi tərbiyəsini düşünməkdən daha çox, ona hədə-qorxu gəlir. Uşağın da təfəkküründə kiçik yaşlardan etibarən cinsi mövzularda danışmağın pis bir şey olduğu təsəvvürü formalaşır. Bu fikir davam etdikcə artıq yetkinlik yaşına çatdıqda da gənclər bu söhbətlərdən çəkinirlər. Hətta evliliyə hazırlaşan şəxslərdə də öz duyğularını, cinsi istəklərini ifadə etmək bacarığı olmur. Bunu müzakirə edə bilməyən gənclərin evlilik zamanı intim münasibətlərində problemlər baş qaldırır, onlar bir-birilərinə uyğun olub-olmadıqlarını aydınlaşdıra bilmirlər. Bu mövzuda heç cür dialoq qura bilməyən gənc cütlük gərginlikdən başqa bir şey hiss etmir, adi məsələlərin həllində belə ortaq fikirə bilmir. Oğlanlar bu barədə danışmağa cəhd edəndə qızlar bunu özlərinə qarşı təhqir hesab edirlər. Ya da əksinə, qızlar bu mövzunu açanda qarşı tərəf onların əxlaqsız, tərbiyəsiz olduğu qənaətinə gəlir. Gənclərin, hətta ailə qurduqdan sonra belə öz aralarında cinsi münasibətlər barədə söhbətlər aparması mədəniyyəti bizim ölkədə hələ də formalaşmayıb. Belə olan halda psixoloqa, psixoterapevtə, hətta seksoloqa müraciət etmək lazımdır. Çoxluq hələ də psixoloq, psixoloji yardımın nə demək olduğunu anlamaq istəmir. Düşünürlər ki, psixoloqa ancaq problemli kəslər, əqli çatışmazlığı olanlar müraciət etməlidir”.
Törə Zeynal