“MAG 70 ölkədə 20 milyondan artıq insana yardım göstərib”.
Ednews xəbər verir ki, bu sözləri Minalar Məsləhətçi Qrupunun (MAG) Azərbaycandakı nümayəndəliyinin sədri Jeanette Dijkstra Avropa İttifaqı (Aİ) və ABŞ Dövlət Departamenti tərəfindən maliyyələşdirilən və Birləşmiş Millətlər Təşkilatının İnkişaf Proqramının (BMTİP) ANAMA, Beynəlxalq Avrasiya Mətbuat Fondu (BAMF) və Minalar üzrə Məsləhət Qrupu (MAG) ilə birgə tərəfdaşlıqla həyata keçirdiyi “Azərbaycan Respublikasının Minatəmizləmə Agentliyinin (ANAMA) imkanlarını artırmaqla məcburi köçkünlərin təhlükəsiz qayıdışına dəstək” layihəsinin açılış mərasimində deyib.
Jeanette Dijkstra həmçinin qeyd edib ki, MAG (Minalar Məsləhətçi Qrupu) humanitar tərkibli, qlobal səviyyədə minalaradan təmizlənmə təşkilatıdır:
“Təşkilat minaları, eləcə də kasetli mərmiləri, partlamamış sursatların tapılması və zərərsizləşdirilməsində hökumətlərə və əhaliyə dəstək verir. Biz hökumətlərə minalardan tənzimlənmə sahəsində bacarıqların inkişaf etdirilməsində dəstək veririk. Standart əməliyyat prosedurlarının təhlili və təkminləşdirilməsi ilə məşğuluq və hər zaman ən yaxşı təcrübəyə əsaslanırıq”.
Nümayəndə sədri eyni zamanda minalarla bağlı təhsil proqramlarına, eləcə də uşaqların məlumatlandırılmasına dəstək verdiklərini vurğulayıb:
“Biz hər zaman çalışırıq ki, həmin ərazini tam təmizləyənə qədər insanlar orada yaşaya, işləyə bilsin və uşaqlar həmin ərazilərdə təhlükəsiz qaydada oynaya bilsinlər”.
“1989-cu ildən etibarən münaqişədən sonra öz həyatını yenidən qurmaq, qazanc imkanlarını əldə etmək məqsədilə məhz MAG 70 ölkədə 20 milyondan artıq insana öz yardımını göstərib”,- deyə J. Dijkstra çıxışının yekununda qeyd edib.
Ülviyyə Şahin