Son zamanlar cəmiyyətdə münasibətlər fonunda ünsiyyət, ailə daxili münaqişlər, anlaşılmazlıqlar və bir sıra neqativ hallar yaşanır. Belə hallar artdıqca da qəzalar, hadisələr, cinayətlər boşanmalar çoxalır. Bütün bunların başlıca səbəbi nələrdir?
Mövzu ilə bağlı Ednews-a şərh bildirən sosioloq Lalə Mehralı qeyd etdi ki, aparılan bütün elmi araşdırmalar psixi problemli insanların empatiya hissinin olmadığını deyir. Yəni dəhşətli qətllər törədən qatillər, canilər, təcavüzçülər bu hissdən məhrumdurlar. Buna görə kimisə soyuqqanlılıqla öldürə, doğraya bilirlər. Çünki həmin an başqalarının nə hiss etdiyini heç bilmirlər.
“Cəmiyyətdəki münasibətlər də belədir. Xüsusilə sosiallaşma virtual platformaya keçəndən insanlarda aqressivlik pik həddədir. Nə qohumluq əlaqələri qalıb, nə qonşuluq, nə yoldaşlıq. Siz son illər bir yerə toplaşan qohumlar müşahidə etmisiniz? Ya evində bişəndən qonşusuna pay aparan? Bunlar sosiallaşmanın təməl qaydalarıdır, əvvəllər normal olan, indi anormal kimi qələmə verilən. Ünsiyyət qurmayan insanların bu təlabatı ödənmədiyi üçün aqressiyası içində yığılır, bir gün yolda, işdə, ailədə kiməsə yönəlir. Ya öldürür, ya döyür. Yəni nəticəsi bütün hallarda təhlükəlidir”.
Ekspertin sözlərinə görə, insanlar sosial problemlərini həll edə bilmədikləri üçün aqressiya ilə yüklənirlər:
“Təsəvvür edin, ailəsinin ehtiyacını ala bilməyən hər hansı bir şəxs var və biz ondan empatiya gözləyirik. O isə başqalarından gözləyir bunu. Yəni qarşılıqlı təmənna var, amma təminat yoxdur. Zehni, fikri ailə qayğıları, maddi problemlər, dolanışıq dərdi ilə yüklənmiş bir adam aqressiya ilə yüklənir, problemləri onu partlayacaq bomba halına gətirib çıxarıb. Dolayısı ilə yolda, dükan-mağazada, işdə qarşılaşdığı hər hansı bir neqativ vəziyyətdə bu aqressiyasını boşaldır”.
Oğuz