QHT sədri İradə Həsənova Ednews saytına ailə məsələsi ilə bağlı müraciət edib. Belə ki, o, bir müddət əvvəl boşanmış oğlunun övladından narahatdır.
İradə Həsənovanın bildirdiyinə görə, keçmiş gəlinin psixoloji problemləri olduğu üçün, ailələri dağılıb və indi daha böyük çətinliklə üz-üzə qalıblar:
“Əvvəlcə onu deyim ki, oğlumun adı Ramazanov Yaqub Bilaloğludur, keçmiş yoldaşı isə Əzizova Raksana Tofiq qızıdır. Evlilik müddətində gəlinimin psixoloji vəziyyəti bilinirdi. 4 il evli olan oğlum uzun sürən problemlərdən sonra boşanmalı oldu. Buna səbəb də həyat yoldaşının psixoloji problemlərinin olması idi. Əvvəllər Azərbaycanda yaşasalar da, sonradan Qazaxıstana köçdülər. Orda problemlər bitmədi. Gəlin uşağı da götürüb, küsüb getmişdi. Ata-anası Alma-Ata şəhərində yaşayırdı.
Deyirdim ki, bu məsələ bitdi, gedib-gəlin eyni şeyi min dəfə deyirdi. Sübut etməyə çalışırdı ki, bu məsələ belə yox elədir. Lap razılaşırdıq, amma yenə sözünü təkrar-təkrar deyirdi. Oğlum bu barədə psixoloq, psixoterapevtlə də görüşdü. Müalicə almaqdan da imtina etdi. Oğlum nə qədər aparmaq istəsə də həkimə getmədi. Psixoterapevt dedi ki, bu xəstəliyi 1 ay boyunca sağaltmaq olar, amma yenidən təkrar edəcək. Çox ciddi xəstəliyin olduğunu demişdi. Adi şeylərin üstündə yoldaşı ilə dalaşırdı. Özüm də müəyyənləşdirirəm ki, onun xəstəliyi narsistlikdir. Xəstəlik haqqında oxuduqca gəlinimdə olduğu simptomlarla kəsişdiyini başa düşdüm. Ancaq öz istədikləri olsun istəyir, qarışı tərəfi heç düşünmürdü”.
İ.Həsənova eyni zamanda uşağın sağlamlığında da ciddi problemlərin olduğunu bildirib:
“Məhkəmənin birinci etapı keçirildi. Qarşı tərəf hay-küy saldı bizim haqqımızda. Şər-böhtan atdılar üstümüzə. Hətta məhkəmənin sədri mənə dedi ki, sizin haqqınızda yalanlar, böhtanlar yayırlar. Niyə onlardan şikayətçi olmursunuz. Dedim ki, utanıram məhkəmələrdə sürünməkdən. Sabah apellayasiya məhkəməsi olacaq. Ananın psixoloji durumu ilə bağlı qərar qəbul edilmədi. Bu dəqiqə qəyyumluq bizdədir. Uşağın psixoloji vəziyyəti, ünsiyyəti yaxşı deyil. Beş yaşı var nəvəmin”.
Bəs qanunla bu necə tənzimlənməlidir? Hansı vəziyyətdə anadan qəyyumluq alına bilər?
Məsələnin hüquqi tərəfini öyrənmək üçün vəziyyəti vəkillə müzakirə etdik. Hüquqşünas Emin Məmmədzadə Ednews-a açıqlamasında bildirib ki, ananın psixi xəstəliyi yoxdursa, narkomaniyadan əziyyət çəkmirsə, alkoqolizm və digər ağır xəstəlikləri yoxdursa, uşaqla qəddar rəftar etmirsə, uşağa qarşı psixi və ya fiziki zorakılığa yol vermirsə, uşaq anadan alına bilməz:
“Nikah məhkəmə üsulu ilə pozulursa, ər-arvad uşağın kimdə qalması ilə bağlı razılığa gələrək məhkəməyə qərarlarını bildirə bilərlər. Əgər belə bir razılıq yoxdursa, o zaman məhkəmə uşaqların kimin yanında qalması ilə bağlı qərarı özü verir. Bu zaman uşağın mənafeyi əsas götürülür. Uşaqların qardaş-bacısına, və yaxud valideynlərdən birinə olan bağlılığı, valideynlərin şəxsi keyfiyyətləri, əxlaqi davranışları, həyat tərzi, uşağın inkişafı üçün şəraitin yaradılması və ən əsas uşağın yaşı əsas götürülür.
Əgər bu halların heç biri yoxdursa və uşaq anadan alınırsa, burada verilən qərarın tərəfsiz olduğuna şübhə ilə yanaşmaq və yüksək instansiyaya müraciət etmək lazımdır” - deyə hüquqşünas bildirib.
Onun sözlərinə görə, nikah pozulması zamanı 10 yaşından böyük uşaqların fikri alınmalıdır. Uşaq, özü hansı valideyni ilə qalacağına qərarı özü verməlidir.
Oğuz