Azərbaycanda ”alternativ hərbi xidmət” qanununun qəbul edilməsi təklif edilib. Bu zaman əgər vətəndaşların əqidəsi həqiqi hərbi xidmət keçməyə ziddirsə, qanunla müəyyən edilmiş hallarda həqiqi hərbi xidmətin alternativ xidmətlə əvəz olunmasına yol verilir.

Bu yeni xidmət forması hansı prinsiplər əsasında fəaliyyət göstərəcək? 

Mələsə ilə bağlı Ednews-a danışan hərbi ekspert Heydər Mirzə bu sistemin dünyanın bir çox dövlətlərində həyata keçirildiyini bildirib.

“Əvvəla onu qeyd edim ki, alternativ xidmət bir dünya praktikasıdır və müxtəlif ölkələrdə müxtəlif formalarda istifadə olunur. Bu qabaqcıl bir praktika olsa da, alternativ xidmət sisteminin tam və işlək şəkildə layihə forması alması üçün daha detallı, bir neçə dövlət qurumunun iştirakı ilə işlər aparılmalıdır. Bu sistem əslində təkcə orduya deyil, iqtisadi və sosial mexanizmlərə də təsir edəcək, onların birgə fəaliyyətini tələb edəcək.

Ola bilsin ki, bu proqram kiçik mərhələlərlə həyata keçirilsin. Düşünürəm ki, tez ya da gec biz də bu sistemi hər hansı bir şəkildə qəbul edəcəyik.  Əlbəttə ki, bu məsələ zaman alacaq və dövlət qurumları ilə ictimai institutların hazır olub olmaması məsələsini də nəzərə almaq lazımdır”.

Ekspert bildirib ki, gənclərin ordu quruculuğuna marağının yüksəkdir deyə bu sistemə keçid etmək əlverişlidir:

“Cənab prezidentin inaqurasiyası zamanı səsləndirmiş olduğu sistemli mesajlardan da görünür ki, ölkəmizin ərazi bütövlüyü tam şəkildə bərpa olunsa da, regiondakı geosiyasi vəziyyət və təhlükəsizlik konteksti heç də sabit deyil. Ölkənin qarşısında duran müxtəlif təhlükələr var və həm ordu, həm də cəmiyyət bu təhlükələrə hər zaman hazırlıqlı olmalıdır. 

Onu da unutmayın ki, hazırda ordunun, güc strukturlarının prestiji olduqca yüksəkdir. Gənclər orduya, güc strukturlarına əksinə, can atır. Belə halda alternativ xidmət məsələsinin aktuallığı da ən azı sual doğurmaya bilməz.”.

Fərid