Aprelin 4-də Beynəlxalq Mina Xəbərdarlığı və Mina Aksiyasına Yardım Günü münasibətilə Azərbaycan Respublikası Minatəmizləmə Agentliyi (ANAMA) yanında İctimai Şuranın üzvləri, Azərbaycanın aparıcı QHT rəhbərləri, bir sıra beynəlxalq təşkilatların nümayəndələri, Beynəlxalq Avrasiya Mətbuat Fondunun (BAMF) icra etdiyi Azərbaycanın ilk Qadın minaaxtaranları, Qeyri-Texniki Təhqiqat və Partlayıcı sursatların təhlükəsinə dair maarifləndirmə layihələrinin əməkdaşları, mina qurbanları və onların ailə üzvlərinin iştirakı ilə Tərtərdə tədbir keçirilib.
Ednews xəbər verir ki, BAMF-ın prezidenti və ANAMA yanında İctimai Şuranın sədri Umud Mirzəyev tədbirdə dünyada və Azərbaycanda mina təhlükəsindən, onun yaratdığı fəsadlardan danışıb:
“Ümumiyyətlə, son 50 ildən çoxdur ki, dünyanın 60-dan yuxarı ölkəsində 60 milyondan çox insan mina fəlakətindən əziyyət çəkib. Azərbaycan dünyanın ən çox mina ilə çirklənmiş ölkələrindəndir, hətta ilk 10 ölkə arasındadır. Bəzilərinin araşdırmasına görə hətta Azərbaycan öz ərazisində yerləşən mina sıxlığına görə 3-cü yerdədir. Ona görə də Azərbaycanın Mina Agentliyi yanında İctimai Şuraın üzvləri, bir qrup vətəndaş cəmiyyəti qrumları, minadan əziyyət çəkən vətəndaşlar və eləcə də bir çox QHT-lərin iştirakı ilə müxtəlif silsilə aksiyalar keçirilir.
Bundan əlavə, biz bu gün böyük qrumlara müraciət elədik və səsləndik ki, Azərbaycanda təşəbbüslə irəli sürülmüş dayanıqlı inkişaf məqsədlərinin 18-ci bəndi ilə bağlı ölkədə addımlar atılıb. Yeri gəlmişkən, Azərbaycan Respublikasının prezidenti İlham Əliyev də bu bəndin qəbul edilməsini dəstəklədiyini açıqlayıb. Buna görə də, biz ölkəmizdə olan problemlərin dünyaya çatdırılması, insanların maariflənməsi və donorlara çağrışlar edilməsini dəstəkləməliyik”.
U.Mirzəyev qeyd etdi ki, Azərbaycan minadan ən çox çirklənmiş ölkədir, bu gün bu problemə qarşı dünyada biganəlik var:
“Biz çağırış etdik ki, bu ölkəyə də bir diqqət ayrılsın. Ermənistanın işğalçı ordusu torpaqlardan çıxarıldı, amma biz yenə də problemlərlə üz-üzə qalmışıq. İki gün öncə Tərtərdə böyük bir partlayış oldu və gənc insanlarımızın sağlamlığına zərər dəydi. Mina təkcə Azərbaycanın problemi deyil, bu bir insanlıq suçudur. Bizim düşmənlərimin öz vəhşi xislətini ortaya qoyub gediblər. Statistika belədir ki, Azərbaycanda bu gün 500-ə yaxın minadan zərər çəkən insan var. Sizə deyim ki, bu hadisələrin şahidi olduq və bu promlemin çözülməsi üçün qüvvələr tez bir zamanda səfərbər olmalıdır. Digər bir tərəfdən bir statistikanı da deyim ki, dünya standartlarına uyğun şəkildə min il vaxt lazımdır ki, mina problem həll olunsun.
Hökumətin dəstəyi və cəlb etdiyi resurslar, ANAMA-da peşəkar mina axtaranlar fəaliyyət göstərir ki, onlar bu prosesi sürətləndirir. Sizlər də bu ərzilərdə fəaliyyət göstərərək bu proseslərin nə dərəcədə sürətlə həyata keçirildiyinin şahidi olursunuz. Maarifləndirmə layihələrimiz çoxdur. Mən inanıram ki, bizim birliyimiz, bizim həmrəyliyimiz bu problemin tezliklə çözülməsinə kömək edəcək. Burada mən bir daha öz həmkarlarıma, media dostlarıma təşəkkürümü bildirmək istəyirəm ki, onlar bu ərazilərdə çalışaraq mövcud problemin həll olunmasına öz qatqılarını veriblər”.
Fərid Axund