“Hər mövsümün özünəməxsus tərəvəz və meyvələri var. Mövsümündə yetişməyən meyvə və tərəvəzlərin yeyilməsi məsləhət görülmür. Təbiət meyvə və tərəvəzləri öz mövsümünə görə kodlaşdırır”.
Bu fikirləri Ednews-a açıqlamasında qida məsələləri üzrə mütəxəssis ekspert Ağa Salamov deyib. Onun sözlərinə görə, havalar istiləşməyə doğru getdikcə insanda tər itkisi olur.
“Tər vasitəsilə mineral itkisi əmələ gəlir. Su tərkibli meyvə və tərəvəzin vaxtında yetişməsi bədəndə itirilən mineralları və suyu bərpa edir. Məsələn, qarpız, yemiş və.s. tərəvəzlərin yayda yetişməsinin əsası budur”.
Ağa Salamov sözlərinə belə davam edib:
“Mövsümündən əvvəl yetişdirilən meyvələri almaq insanların büdcəsinə də ziyandır. İkincisi də bunlar təbii deyil, parnik meyvəsidir. Mövsümündən əvvəl yetişən meyvələrin heç bir faydası yoxdur”.
Ekspertin sözlərinə görə, o cür meyvələr hibrid sayılır. Onların yetişdirilməsində 2 pestisiddən istifadə olunur. Bunun biri yabanı otlara, digəri isə qurdlara qarşıdır. Pestisid kimyəvi dərmanlama prosesidir.
“Bu da kimyəvi zəhərlənmələrlə insanları üz-üzə qoyur. Məsəl üçün allergik reaksiyalar, dəridə səpki, qaşınma və s. Müəyyən qədər çox istehlak olunduqda hüceyrələrə təsir edir. Hüceyrələrə təsir etdik də xərçəng riskinə səbəb olur”.
Aynurə İsmayıl