Şuşada Beynəlxalq Liderlik və Diplomatiya Konfransı keçirilib.

Ednews xəbər verir ki, “Şuşa - İslam Əməkdaşlıq Təşkilatının Gənclər Paytaxtı 2024" Beynəlxalq Proqramı çərçivəsində təşkil olunan konfransı İslam Əməkdaşlıq Təşkilatı Gənclər Forumunun (ICYF) Avrasiya üzrə Regional Mərkəzinin direktoru Elçin Əsgərov açaraq liderlik və diplomatiya mövzusunun gənclər üçün kifayət qədər əhəmiyyətli olduğunu vurğulayıb.

Milli Məclisin deputatı Naqif Həmzəyev Şuşanın İƏT-in Gənclər Paytaxtı seçilməsinin əhəmiyyətinə də toxunub, şəhərin işğal dövründə dağıntılara, vandalizmə məruz qaldığını xatırladıb və gənclərdən bu həqiqətləri beynəlxalq arenada davamlı qaldırmağı xahiş edib.

Azərbaycan Gənclər Forumunun (AGF) icraçı direktoru Qədir Xəlilov işğal dövründə ermənilərin ölkənin mədəni irsinə vurduğu zərbələri yada salıb, bu cür məsələlərdə diplomatiyanın önəmindən danışıb. O, bu il Azərbaycanda keçirləcək tədbirlər və perspektivlər barədə məlumat verib, ölkənin inkişafında gənclərin rolunu vurğulayıb.

Daha sonra konfrans iştirakçıları beynəlxalq münasibətlərin formalaşmasında liderliyin rolu ilə bağlı düşündürücü panel müzakirələrdə iştirak ediblər.

Tədbir çərçivəsində iqlim diplomatiyasına həsr olunmuş geniş seminar keçirilib. Konfrans qlobal miqyasda diplomatik diskussiyanın formalaşmasında gənclərin iştirakının vacibliyini vurğulayan yekun nitqlə yekunlaşıb.

Qeyd edək ki, “Şuşa - İslam Əməkdaşlıq Təşkilatının Gənclər Paytaxtı 2024" Beynəlxalq Proqramı çərçivəsində Şuşada təşkil olunan silsilə tədbirlərdə dövlət rəsmiləri, İƏT Gənclər Forumu, İslam Əməkdaşlıq Təşkilatına üzv ölkələrin nümayəndə heyətləri, müxtəlif qurumların, təşkilatların rəhbər nümayəndələri və 36 ölkədən 150-dən çox gənc iştirak edir. Silsilə tədbirlər 3-6 iyun 2024-cü il tarixlərini əhatə edir.
Xatırladaq ki, İƏT ”Gənclər Paytaxtı” beynəlxalq proqramı 2015-ci ilin mayında Küveytdə keçirilən İƏT Xarici İşlər Nazirlərinin Konfransında İƏT-ə üzv 56 ölkənin xarici işlər nazirlərinin səsverməsi ilə qəbul edilib və ilk İƏT ”Gənclər Paytaxtı” Türkiyənin İstanbul şəhəri olub. Şuşa İslam dünyasında bu missiyanı yerinə yetirən 10-cu şəhərdir. 2023-cü ilin oktyabr ayında İƏT Gənclər Forumunun İcraiyyə Şurasının 11-ci iclasında Qarabağın incisi Şuşa şəhəri 2024-cü il üçün “İslam Əməkdaşlıq Təşkilatının Gənclər Paytaxtı” elan olunub.