Azərbaycan startaplar və innovasiyalar üçün əlverişli mühitin yaradılmasında mühüm irəliləyiş əldə edib.
Ednews xəbər verir ki, bu barədə Dünya İqtisadi Forumunun (WEF) “IDEA: Azərbaycanın rəqəmsal iqtisadiyyatına investisiya” hesabatında deyilir.
Hesabata görə, irəliləyiş biznesin inkişafına dəstək və innovasiyaların təşviqinə yönəlmiş çoxsaylı institutlar və proqramların yaradılmasında (məsələn, irimiqyaslı tədbirlər, texnoparklar və biznes inkubatorların inkişafı) öz əksini tapıb.
WEF qeyd edir ki, Azərbaycan Prezidentinin fərmanına uyğun olaraq, bu sahədə əlaqələndirməni və inkişafı təmin etmək məqsədilə İqtisadiyyat Nazirliyi tərəfindən “İnnovasiya fəaliyyəti haqqında” qanun layihəsi hazırlanır.
Son illər Azərbaycanda rəqəmsal iqtisadiyyat sosial-iqtisadi inkişaf məqsədlərinin tərkib hissəsi kimi qəbul edilir. Sənəddə bildirilir ki, iqtisadiyyatın şaxələndirilməsi və hasilat sənayesindən asılılığın azaldılması üzrə milli baxışa uyğun olaraq, Azərbaycan rəqəmsal inkişafın təşviqində və qlobal rəqabət qabiliyyətinin artırılmasında birbaşa xarici investisiyaların rolunu həlledici hesab edir. Azərbaycan hökuməti 2022–2026-cı illərdə sosial-iqtisadi inkişaf Strategiyası vasitəsilə xarici investisiyaların cəlb edilməsinə, islahatların həyata keçirilməsinə və özəl sektorun stimullaşdırılmasına xüsusi diqqət yetirir.
Hesabatda vurğulanır ki, Azərbaycana birbaşa xarici investisiyaların əsas hissəsinin neft-qaz sektoruna daxil olmasına baxmayaraq, ölkədə fəaliyyət göstərən xarici investorların fəaliyyətinə diqqətlə nəzər saldıqda yeni investisiya layihələrinin əksəriyyəti (2016-cı ilin yanvarından 2023-cü ilin aprelinədək) maliyyə/biznes xidmətləri, proqram təminatı, İT xidmətləri və sənaye avadanlıqlarının istehsalı kimi sektorlarda cəmləşib.
Azərbaycan hökuməti rəqəmsal iqtisadiyyata diqqət yetirməklə genişmiqyaslı islahatlar həyata keçirir. Hesabat müəllifləri həyata keçirilən tədbirlər sırasında Rəqəmsal İqtisadiyyat Strategiyası və 2022–2026-cı illərdə sosial-iqtisadi inkişaf Strategiyasının hazırlanmasını qeyd edirlər. 2022-ci ilin dekabr ayından etibarən bu strategiyanın hazırlanması üçün dayanıqlı və rəqabətədavamlı rəqəmsal iqtisadiyyatın yaradılması məqsədilə ölkədə Dördüncü Sənaye İnqilabının Təhlili və Koordinasiyası Mərkəzinin (4SIM) nəzdində xüsusi işçi qrupu yaradılıb.
