Bu sözləri martın 27-də BMT-nin Cenevrə ofisində İnsan Hüquqları şurasının 58-ci Sessiyası çərçivəsində Beynəlxalq Avrasiya Mətbuat Fondunun təşkilatçılığı və Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin dəstəyi ilə keçirilən “Konflikt zonalarında uşaqların hüquqları” adlı yan tədbirdə BAMF prezidenti Umud Mirzəyev səsləndirib.

O, ötən əsrin sonlarından başlayaraq Azərbaycan və Ermənistan münaqişəsinin mənfi təsirlərinə məruz qalan azərbaycanlı uşaqlardan söz açıb: 

“BMT-nin İnsan Hüquqları Şurasının 58-ci sessiyası çərçivəsində münaqişə zonalarında yaşayan uşaqların hüquqlarından danışmaq mənim üçün xüsusi əhəmiyyət kəsb edir. Təəssüflə qeyd etməliyəm ki, 1988-1989-cu illərdə etnik təmizləmə nəticəsində indiki Ermənistan ərazisindən 300 mindən artıq azərbaycanlı, o cümlədən on minlərlə uşaq yaşadığı torpaqlarından deporatsiya olunmuşdur. Birinci Qarabağ müharibəsində isə Dağlıq Qarabağ və ətraf rayonlarda öldürələnlər arasında yüzlərlə uşaqlar var idi. Həmin müddətdə 693 məktəb, 855 uşaq bağçası və 695 tibbi müəssisə dağıdılmışdır. Hətta, 2020-ci il İkinci Qarabağ müharibəsində mülki ərazilərə hücumlar nəticəsində 10-dan çox Azərbaycanlı uşaq həlak olmuş, 50-yə yaxın uşaq yaralanmışdır.”

Umud Mirzəyev, həmçinin, problemin yeganə həllinin sülh olduğuna vurğu edərək dünyada son baş verənlərə rəğmən nikbin olduqlarına qeyd edib:

“Gəlin birlikdə ümidsizliyin hökm sürdüyü yerlərə ümid gətirək, narahatlığımızı real addımlara çevirək. Uşaqların hüquqlarını müdafiə edək. Bunun üçün ən yaxşı yol sülhdür. Sevindirici haldır ki, artıq Azərbaycan və Ermənistan arasında sülh anlaşmasının imzalanması çox yaxındır. Həmçinin, biz ümid edirik ki, sülh ən qısa zamanda Qəzzada və Ukraynada da bərqərar olacaq.”