Taleh Yüzbəyovun rol aldığı “dondurma və qadın” reklamının sosial şəbəkələrdə geniş müzakirələrdən sonra silinməsi reklam etikası və brend reputasiyası mövzusunu yenidən gündəmə gətirib.
Brend və marka strategiyası üzrə mütəxəssis Aida Ramiz EDnews-a açıqlamasında bildirib ki, son hadisə göstərdi ki, müasir auditoriya yalnız məhsula deyil, brendin verdiyi mesaja və təmsil etdiyi dəyərlərə də ciddi diqqət yetirir.
Onun sözlərinə görə, reklamın silinməsinin əsas səbəbi insanların məhsulun özündən daha çox reklamın ötürdüyü mesajı müzakirə etməsi olub.
“Xüsusilə qadın obrazının təqdimatı ilə bağlı yaranan narazılıqlar qısa müddətdə geniş ictimai reaksiyaya səbəb oldu”
Aida Ramiz qeyd edib ki, reklam kampaniyasında məhsulun üstünlükləri deyil, etik baxımdan mübahisəli məqamlar ön plana çıxırsa, bu, brendin reputasiyasına ciddi zərbə vurur:
“Ən böyük risk reklamın çox izlənməsi deyil, yanlış səbəbdən gündəmə gəlməsidir. Əgər insanlar məhsulu yox, reklamın etik tərəflərini müzakirə edirlərsə, bu artıq uğurlu kommunikasiya hesab oluna bilməz”.
“Kreativlik təkbaşına kifayət etmir”
Ekspert bildirib ki, müasir dövrdə yalnız yaradıcı reklam hazırlamaq uğur üçün kifayət deyil.
Onun fikrincə, reklam hazırlanarkən kreativliklə yanaşı sosial məsuliyyət, mədəni həssaslıq və reputasiya riskləri də nəzərə alınmalıdır.
“Bugünkü PR strategiyalarında yalnız kreativ ideya kifayət etmir. Sosial məsuliyyət, mədəni həssaslıq və reputasiya riskləri birlikdə qiymətləndirilməlidir”.
“Qadın və ailə mövzularında əvvəlcədən böhran ssenarisi hazırlanmalıdır”
Aida Ramiz vurğulayıb ki, qadın, ailə, məişət və cəmiyyətlə bağlı mövzular daha həssas olduğundan belə kampaniyalar üçün əvvəlcədən mümkün böhran ssenariləri hazırlanmalıdır.
Onun sözlərinə görə, müxtəlif auditoriyaların verə biləcəyi reaksiyalar da əvvəlcədən analiz edilməli və mümkün kommunikasiya planı müəyyənləşdirilməlidir.
Aida Ramiz əlavə edib ki, uzunmüddətli uğurun əsas şərti auditoriyanın etimadını qorumaq və brend dəyərlərinə uyğun kommunikasiya aparmaqdır.
