Son dövrlər avtomobil yanğınlarının sayının artması sürücülərdə narahatlıq yaradıb.
Mövzu ilə bağlı nəqliyyat üzrə ekspert Ərşad Hüseynov EDnews-a açıqlamasında əsas səbəbləri və görülməli tədbirləri izah edib.
Ərşad Hüseynov bildirib ki, avtomobillərin yanması və ya qəfil alışması müxtəlif amillərlə bağlıdır.
Onun sözlərinə görə, əsas səbəblərdən biri nəqliyyat vasitəsinin texniki vəziyyəti və vaxtında baxımdan keçirilməməsidir.
Ekspert qeyd edib ki, son illər sosial şəbəkələrdə və mediada bu cür hadisələrə daha çox rast gəlinir. Xüsusilə Çin istehsalı olan, eləcə də elektrik mühərrikli avtomobillərlə bağlı yanğın xəbərləri diqqət çəkir. Bununla yanaşı, o vurğulayıb ki, bu problem təkcə həmin markalara aid deyil və digər istehsalçıların avtomobillərində də oxşar hallar müşahidə olunur.
“Yay aylarında risk daha yüksək olur”
Ərşad Hüseynovun sözlərinə görə, yüksək temperatur avtomobillərdə yanğın riskini artıran əsas amillərdən biridir.
“İsti hava şəraiti, elektrik sistemində yaranan nasazlıqlar, akkumulyator və xüsusilə elektrik avtomobillərinin batareyalarında baş verən problemlər yanğın təhlükəsini artırır. Buna görə də sürücülər avtomobillərini mütəmadi texniki baxışdan keçirməlidirlər”,- deyə ekspert bildirib.
“Yeni nəsil avtomobillər daha çox nəzarət tələb edir”
Ekspert hesab edir ki, əvvəllər bu cür hadisələrə daha az rast gəlinirdi. Müasir avtomobillərdə elektron sistemlərin və batareyaların sayının artması profilaktik texniki qulluğu daha da vacib edir.
Onun fikrincə, uzun məsafəyə çıxmazdan əvvəl avtomobilin ümumi texniki vəziyyəti yoxlanılmalı, elektrik sistemi, akkumulyator, mühərrik bölməsi və soyutma sistemi mütləq nəzarətdən keçirilməlidir.
Ərşad Hüseynov sürücülərə məsləhətlər verərərk bildirib ki, avtomobili vaxtında texniki baxış və “check-up”dan keçirin, elektrik sistemi və akkumulyatorun vəziyyətini mütəmadi yoxladın, uzun səfərə çıxmazdan əvvəl avtomobilin texniki sazlığını yoxlayın, xüsusilə yay aylarında avtomobilə profilaktik qulluq göstərilməsinə diqqət yetirin.
Ekspert vurğulayıb ki, sadə profilaktik tədbirlər həm avtomobil yanğınlarının qarşısını almağa, həm də sürücülərin və sərnişinlərin təhlükəsizliyini təmin etməyə kömək edir.
