ABŞ Prezidenti Donald Trampın İran rəhbərliyinin harada olduğu barədə son açıqlamaları regionda gərginliyin yenidən artırıb.
Politoloq Məhəmməd Əsədullazadə EDNews-a açıqlamasında bildirib ki, İran-İsrail qarşıdurması yeni mərhələyə qədəm qoyub və atəşkəsin pozulması bölgədə eskalasiyanı daha da sürətləndirib.
Onun sözlərinə görə, əldə olunan memorandum və razılaşmaların praktik nəticə verməməsi İran daxilindəki sərt xətt tərəfdarlarının mövqeyi ilə bağlıdır.
“İran daxilində mühafizəkar və sərt xətt tərəfdarları ABŞ ilə hər hansı razılaşmanın əldə olunmasını istəmədilər. Onlar hakimiyyətdə mövqelərini qorumağa çalışır və islahatçı qüvvələrin güclənməsinə imkan vermirlər. Atəşkəsin pozulması da məhz bu siyasi xəttin davamı kimi qiymətləndirilə bilər”.
“Trampın əsas strategiyası sərt xətt tərəfdarlarını zəiflətmək ola bilər”
Politoloq hesab edir ki, ABŞ administrasiyası artıq diplomatik danışıqlardan gözlənilən nəticəni əldə etməyəcəyini düşünür və bundan sonrakı mərhələdə fərqli strategiyaya üstünlük verə bilər.
“Donald Trampın qarşısında duran əsas strategiya İranın sərt xətt tərəfdarı olan yüksək rütbəli hərbi-siyasi fiqurlarını təsirsiz hala gətirmək ola bilər. İsrail tərəfi də bu istiqamətdə müxtəlif mesajlar verib. Bu baxımdan, ABŞ-ın yenidən hədəfli əməliyyatlara və ya sui-qəsd xarakterli addımlara üstünlük verməsi istisna deyil”.
“Danışıqların perspektivi zəifləyir”
Məhəmməd Əsədullazadənin fikrincə, hazırkı şəraitdə Vaşinqtonun İranla diplomatik dialoqa əvvəlki qədər ümid bəsləməsi real görünmür.
“Əsas məqsəd İran siyasi sistemində sərt xətt tərəfdarlarının təsir imkanlarını azaltmaq və islahatçı qüvvələrin mövqeyini gücləndirməkdir. Mövcud proseslər göstərir ki, yaxın perspektivdə danışıqlardan ciddi nəticə əldə olunacağına inam zəifləyib”.
Politoloq qeyd edib ki, regionda gərginliyin inkişaf istiqaməti bundan sonra ABŞ və İsrailin atacağı addımlardan, eləcə də İran daxilindəki siyasi balansın necə dəyişəcəyindən asılı olacaq.
