Bildiyimiz kimi, martın 2-də Ermənistanda prezident seçkiləri keçiriləcək. Bu seçkilərin nəticələrinin Dağlıq Qarabağ münaqişəsinin həlli prosesinə hansı təsiri ola biləcəyinə dair Qərbi Kaspi Universitetinin Tətbiqi Politologiya Mərkəzinin siyasi eksperti Qadir Kazımov Eurasia Diary-ə danışıb.

Ekspertin sözlərinə görə, son dövrlərdə Ermənistanda baş verən siyasi proseslərin Dağlıq Qarabağ ətrafındakı məsələləri hansı müstəviyə daşıyacağı çoxlarını maraqlandırır. Qeyd etmək lazımdır ki, Ermənistanın Avropa İttifaqı (Aİ) ilə “Şərq tərəfdaşlıq” proqramını imzalamasından sonrakı dövr, özünəməxsusluğu ilə seçilməkdədir. Bildiymiz kimi, Ermənistan dövləti parlament idarə üsuluna keçəcəklərini bəyan etdi. Parlament üsuluna keçiləcəyi təqdirdə prezidentin səlayihətlərinin məhdudlaşacağı, əksinə Baş nazirin başçılıq etdiyi hökumətin parlament tərəfindən formalaşdırılacağı məlumdur. Sözü gedən seçkilər 2 mart tarixində baş tutacaq. Heç kəsə sirr deyil ki, hazırki prezident Serj Sarkisyan bununla hakimiyyət müddətini daha da uzatmaq niyyətindədir və baş nazir postuna bir nömrəli namizəd də məhz özüdür. Sarkisyanın hakimiyyət müddətini uzatma səylərindən əlavə başqa bir məqamı da nəzərə almaq lazımdır. Fikrimcə Sarkisyan parlament idarə üsuluna keçməklə, hakimiyyət müddətini uzatmaqdan başqa, həm də daha çox Avropa dövlətlərinə xas olan bu idarə üsulu ilə, Avropanın gözündə “ideal dövlət” obrazını canlandırmağa çalışır. Bununla  Sarkisyan əsas planı olan hakimiyyət müddətini uzatmaq məsələsinə mədəni formada desək “don geyindirmiş” olur. Bundan əlavə Sarkisyan Ermənistanın Böyük Britaniyadakı səfiri, keçmiş baş nazir Armen Sarkisyanın növbəti prezidentliyə namizəd olduğunu da bəyan edib".

 "Sözü gedən proseslərin Dağlıq Qarabağla bağlı danışıqlara nə kimi təsirinin olmasına gəldikdə isə, deyə bilərəm ki, burda dəyişən sadəcə idarə formasıdır ki, hökümət başçısı da buna uyğun olaraq öz vəzifəsini dəyişəcək və hakimiyyətini yenidən bərpa edəcək. Bir sözlə Ermənistandakı 2 mart seçkilərindən sonraki dövr mahiyyət etibarı ilə formal xarakter daşıyacaq və bunun da məntiqi nəticəsi olaraq, Dağlıq Qarabağ ətrafında olan danışıqların elə olduğu kimi qalması ilə nəticələnəcək. Fikrimcə, Ermənistan bu qarışıq vəziyyətdə Azərbaycanla hansısa bir gərginlik yaratmaq da istəməyəcək. Çünki Qarabağla bağlı cəbhə xəttində hansısa bir uğursuzluq Sarkisyanın mövqeyinə ciddi zərbə vuracaq və bu da seçkilərdə öz əksini tapa bilər. Düşünürəm ki, Azərbaycan tərəfi Ermənistanda baş verəcək mart seçkilərinə qədər Ermənistana həm hərbi, həm siyasi nöqteyi nəzərdən çox böyük təzyiq etməlidir. Deyilənlər baş verərsə, Sarkisyan seçkilərdə mövqeyinə çox ciddi zərər gəlməsindən ehtiyatlanacaq və belə olan təqdirdə, Azərbaycana Qarabağla bağlı danışıqların yeni müstəviyə keçməsinə vəd verə bilər. Göründüyü kimi Azərbaycan Ermənistandakı seçkilərə təsir etmə gücündədir və belə olan təqdirdə, Azərbaycan bunu öz xeyrinə rahatlıqla istifadə edə bilər", deyə ekspert qeyd edib.

 "Sonda isə onu qeyd etmək lazımdır ki, yalnız seçkilərə qədərki proseslər bu münaqişənin yeni müstəviyə çıxmasına şərait yarada bilər. Əgər seçkilərə qədər hansısa bir ciddi prosses baş verməsə, onsuz da mahiyyət etibarı ilə dəyişməyən erməni hakimiyyətindən Qarabağla bağlı heç bir dəyişiklik gözləmək olmaz. Bir faktoru da nəzərə almaq lazımdır ki, seçkilərdən sonra baş nazirin statusu prezidentin statusundan yüksək olacağından bundan sonra böyük ehtimalla Azərbaycan prezidenti ilə Ermənistanın baş naziri görüşəcək. İkincisi isə Qarabağ məsələsində Ermənistan parlamentinin danışıqları daha çox nəzarətə götürməsi imkanları artır", deyərək o sonda bildirib. 

Gülnar Səlimova