Türkiyə öz siyasətində ABŞ və digər NATO dövlətləri ilə münasibətlərin yumşaldılması xəttini seçməlidir.
Bu sözləri politoloq Qabil Hüseynli deyib. O bildirib ki, ABŞ dünyanın nəhəng dövlətlərindən biridir:
“Türkiyənin siyasətində NATO-nun ümumi konsepsiyası ilə üst-üstə düşməyən məqamlar var. Xüsusilə Türkiyənin Rusiyaya meyillənməsi və Rusiyadan S-400 hava hücumundan müdafiə komplekslərini alması, hətta Amerikanın və NATO-nun xəbərdarlıqlarına baxmayaraq, Putinin Türkiyəyə son səfərində bu məsələyə nöqtə qoyulmuş kimi çıxış etməsi də ABŞ-ı qəzəbləndirən hadisələr sırasındadır. Digər tərəfdən, bir keşiş üzərində tədqiqat apararaq və onun FETÖ-çu, casus olduğunu və dövlət çevrilişinə cəhddə iştirak etdiyini dönə-dönə vurğulamağın mənası başadüşülən deyil. Keşişin müəyyən günahları olduğunu qəbul etsək, dövlətin ali maraqları xatirinə ABŞ-la keşiş məsələsində kompromisə getmək lazımdır”.
Politoloqun fikrincə, Qərb dünyası ilə yaxınlığın Türkiyəyə çox şey qazandırdığını tarix sübut edib:
“Rusiya ilə yaxın dost münasibətlərinə malik olmağın da yararları var. Amma bunu qıcıq törədən, nümayişkaranə bir tərzdə tətbiq etməyə çalışan Türkiyə xalqın ali məqsədlərini zərbə altında qoymamalıdır. Bu dünya güclü və gücsüzün münasibətləri üzərində qurulub. ABŞ və bütün Qərb dünyası ilə rəqabət aparmaq, onun rəhbərləri ilə qeyri-diplomatik dildə danışmaq Türkiyə dövlətinin maraqlarına uyğun gəlməz”.
Politoloq vurğulayıb ki, Türkiyə NATO ölkələri ilə münasibətlərin düzəlməsi istiqamətində addımlar atmalıdır:
“Türkiyəyə öz qardaş dövlətimiz kimi baxırıq və onun inkişafını öz inkişafımızdan zərrə qədər ayırmırıq. Ona görə də Türkiyənin qonşuları, mənsub olduğu blokla münasibətlərinin gərginliyi həyəcan yaradır. Bu həyəcanın sonradan Türkiyə ilə həmin dövlətlər arasındakı gərgin münasibətlərə çevrilməsini istəmərik. Türkiyə ABŞ-ın imperialist dövlət olduğunu unutmamalıdır. Əks təqdirdə ABŞ Yaxn Şərqdə Türkiyənin qonşuluğunda kürd dövlətinin qurulmasında daha fəal iştirak edə bilər”.(axar.az)