Xəbər verdiyimiz kimi Ermənistan silahlı qüvvələri işğal etdikləri Azərbaycan torpaqlarında hərbi təlim keçirir. Təlimlər Ağdamın Uzundərə adlanan ərazisində keçirilir. Təlim zamanı iriçaplı silahlardan atılan atəş səsləri cəbhə xəttinə yaxın yerləşən Mirəşelli, Bənövşələr, Eyvazlı, Quzanlı kəndlərindən eşidilir.
Məsələylə bağlı beynəlxalq hüquq məsələləri üzrə ekspert prof. Fərhad Mehdiyev Eurasia Diary-ə ekskluziv açıqlamalar verib.
F. Mehdiyev qeyd edib ki, beynəlxalq hüquqa əsasən işğal faktı qanunsuz olduğundan, işğal edilmiş ərazilərdə keçirilən bütün tədbirlər də qanunsuz hesab edilir. Xüsusən təmas xəttində yaxın ərazilərdə hərbi təlimlərin keçirilməsi açıq-aşkar provakasiya mahiyyəti daşıyır. Bu Azərbaycana verilən “göz dağıdır”. Nəzərə almaq lazımdır ki, bir neçə gün əvvəl işğalçı ölkənin müdafiə naziri Nyu-Yorkda açıq şəkildə yeni ərazilərin işğal ediləcəyini bildirmişdi. Bu təlimlər də məhz bu səbəbdən işğal təhlükəsi olaraq nəzərdən keçirilməlidir.
Bir faktı da qeyd etmək istərdim ki, beynəlxalq hüquqi prinsiplərə əsasən tərəflər arasında danışıqların, dialoqların davam etdirilməsi hərbi əməliyyatların həyata keçirilməsinə heç bir əngəl törətmir. Əgər Ermənistan Azərbaycanı “yeni ərazilərin işğal edilməsi” ilə hədələyib və bundan bir neçə gün sonra təmas xəttində hərbi təlimlərə başlayıbsa bu qarşı tərəfə layiqli cavab vermək üçün ideal fürsətdir.
Mövzuyla bağlı hərbi ekspert, ehtiyatda olan polkovnik Üzeyir Cəfərovsa qeyd edib ki, son günlərdə yaşanan bir neçə hadisə birbaşa Azərbaycanın xeyrinədir.
Ermənistan Müdafiə Naziri David Tonoyanın yeni ərazilərin işğalıyla bağlı açıqlaması, Paşinyanın bu açıqlamanı dəstəkləməsi, danışıqların intensivləşdiyi bir zamanda Qarabağda, Ağdamda təmas xəttinə yaxın ərazidə hərbi təlimlərin başlanması Azərbaycana imkan verir ki, öz ərazilərini işğaldan təmizləsin.
Maraqlıdır ki, həm tonoyanın sayıqlamalarına, həm də Qarabağda ermənilərin hərbi təlimlərə başlamasına ATƏT və digər beynəlxalq qurumlar heç bir reaksiya göstərmir. Əgər ATƏT işğal edilmiş rayonların qaytarılmasını qoyduq bir kənara, bu ərazilərdə beynəlxalq hüququqa zidd olan fəaliyyətlərin qarşısını almırsa onda bu qurum kimə və nəyə lazımdır? Belə hesab etmək olar ki, ATƏT həmsədrləri ümumiyyətlə münaqişənin həllində maraqlı deyillər və ona görə də Ermənistanın bu tipli radikal addımlarına susurlar.
Vyanada sülhdən və atəşkəsin qorunmasından dəm vuran Ermənistan danışıqların üstündən heç bir ay keçməmiş Ağdamda hərbi təlimlərə başlayır. Bu həyasızlıq və riyakarlıqdır. Ermənilər bu təlimlərlə açıq şəkildə Azərbaycanın ərazilərini geri qaytarmayacaqlarını göstərirlər. Belə hesab edirəm ki, bütün bunlara Azərbaycan əsgəri layiqli cavab verəcək. Ermənilərin ard-arda gələn provakativ bəyanatları və əməllərinə veriləcək əsas cavab hərbi əməliyyatlara start vermək olmalıdır. Azərbaycanın buna gücü və imkanı var. Ermənilərin bu həyasız əməllərinə son verməyin vaxtı çatıb...
Nicat İsmayılov
Əmrullayev Əmrulla