Siyasi şərhçilər  Cenevrədə Kerri və Lavrov görüşü  və Suriyada münaqişənin nizama salınması haqqında fikirlərini “Eurasia Diary”yə açıqlayıblar.

Sentyabrın 10-da ABŞ və Rusiya Federasiyası arasında imzalanan razılaşmaya əsasən sentyabrın 12-si, saat 00:00-dan etibarən Suriyada hökumət qüvvələri və müxalifətin silahlı qrupları arasında atəşkəs qüvvəyə minir. Razılaşma İsveçrənin Cenevrə şəhərində Rusiya xarici işlər naziri Sergey Lavrov və ABŞ dövlət katibi Con Kerrinin arasında keçirilən 13 saatlıq görüşdən sonra əldə edilib.-Red. 

 “Rusiya və ABŞ arasında razılığın Suriyada sülhün bərqərar olmasına nə dərəcədə kömək edəcəyini  əvvəlcədən demək çox çətindir” – A.Manoylo

Rusiyanın tanınmış politoloqu, Rusiya Təhlükəsizlik Şurasının nəzdində Elmi Şuranın üzvü  Andrey Manoylo qeyd edir ki, Suriya münaqişəsinin sülh yolu ilə nizamlanmasına dair plan BMT-nin Təhlükəsizlik Şurasının 2254 saylı qətnaməsində ifadə edilib.  ABŞ və Rusiya eyni zamanda bu qətnamənin icraçılarıdır və hər iki tərəf  münaqişənin həll olunmasında eyni dərəcədə öhdəlik daşıyır.

 Problem Rusiya və ABŞ-ın bu işdə öhdəliyi öz üzərinə götürməsində deyil, bu işin reallaşdırılmasına fərqli mexanizmlərlə  müxtəlif yanaşmasındadır. Bu  prosedurların sinxronlaşdırılması haqqında Cenevrədə  Lavrov və Kerri arasında danışıqlar aparılıb.

Rusiya və ABŞ arasında fikir ayrılığı

Ekspert  A.Manoylonun dediyinə görə, iki ölkə arasında olan fikir ayrılıqlarının əsas məğzini heç kəs tərəfindən riayət edilməyən  atəşkəsin dayandırılması rejimi, terroristlərin ”pis” və “yaxşı”  tərəflərə bölünməsi, ABŞ-ın bəzi ərazilərdə, xüsusilə Hələbdə  nəzarəti öz əlində saxlamaq cəhdi, onların gələcəkdə Suriyada gedən proseslərdə aktiv iştirakı, öhdəlikləri  və  kürd problem təşkil edir.

Lavrov-Kerri paktı

Manoylo qeyd edib ki, məhz bu problemlər haqqında Cenevredə Lavrov və Kerri arasında müzakirələr getdi  və razılaşma əldə edildi. Mətbuat üçün gizli olan, imzalanan protokolda qeyd edilən  5  saziş  isə gələcəkdə Lavrov-Kerri paktı adlandırılacaq.

Atəşkəs, sülh yox!

Ukraynalı politoloq, “Penta” siyasi tədqiqatlar mərkəzinin sədri  Vladimir Fesenko  isə “Eurasia Diary”yə açıqlamasında bildirir ki, bu razılığa əsasən atəşkəs müvəqqəti xarakter daşıyır və bu barışıq üçün atılan ilk addım deyil. Ölkələr arasında olan fikir ayrılıqları içərisində ilk növbədə Bəşər Əsəd rejiminin taleyi  həll olunmamış qalır. Ən yaxşı halda bu razılıq Suriya böhranının tədricən həll olunmasına kömək edə bilər.  Böyük ehtimalla sözügedən razılıq müvəqqəti  xarakter daşıyacaq.