İspaniya La Liqasının dördüncü turunda ötən mövsümün çempionu "Barselona" öz meydanında "Valensiya"nı qəbul edib.
Eurasia Diary xəbər verir ki, azarkeşlər maraqlı bir idman mübarizəsi izləyiblər.
"Barsa" oyunun ilk 7 dəqiqəsində qonaqların qapısından iki qol keçirib. "Barselona"nın gənc oyunçusu Ansu Fati 2-ci dəqiqədə Frenk de Jonqun ötürməsini qola çevirərək "Kamp Nou"nu ayağa qaldırıb. Oyunun 7-ci dəqiqəsində isə Ansu Fatinin asistliyi ilə Frenk de Jonq komandasının ikinci qolunu vurub. 27-ci dəqiqədə "Valensiya"nın oyunçusu Kevin Kameiro fərqlənib.
Komandalar fasiləyə 2:1 hesabı ilə yollanıblar.
İkinci hissədə Pike "Barselona"nın 3-cü qolunu "yarasalar"ın qapısından keçirib. Matçın 60-cı dəqiqəsində meydana Ansu Fatinin əvəzinə yenicə zədəsi sağalan Luis Suarez çıxıb və 1 dəqiqə sonra qol vurub. 82-ci dəqiqədə Suarez özünün ikinci, komandasının isə 5-ci qoluna imza atıb. 82-ci dəqiqədə rəqib komandanın oyunçusu Maksi Qomez fərqlənib.
Beləliklə, matç "Barselona"nın 5-2 hesablı darmadağını ilə yekunlaşıb.
Qeyd edək ki, "Barselona"nın əsas qol silahı, komandanın kapitanı Lionel Messinin zədəsi tam sağalmadığından o, bu matçı da buraxıb. Messi qarşılaşmanı tribunadan izləyib.