Türkiyənin İstanbul şəhərində qanunsuz mərc oyunları ilə bağlı aparılan istintaq çərçivəsində barəsində 5 il 3 ay həbsi istənən iş adamı Acun Ilıcalı ittihamla bağlı açıqlama verib.

“EDnews” xəbər verir ki,  o bu barədə "TV100"də yayımlanan "Kale Arkası" proqramında danışıb.

Ilıcalı bu işdə günahsız olduğunu bildirib.

"Mən xaricdən aldığım oyunları yayımlayanda, stadionda görünən reklamlar olur. Ancaq hər yerdə başlıqlarda Acunun adı hallanır! Mən nə etdim ki? Milli matçı yayımladım, stadionda qeyri-qanuni reklam olub, mən nə edə bilərdim ki?

Mən sadəcə xaricdən matçı satın almışam, heç bir şeyə müdaxilə etməmişəm. Açıq şəkildə soruşmaq istəyirəm: bu mövzularda niyə danışılmır? Görünən odur ki, müəyyən bir qrup məni hədəf seçib və məsələ məhkəməyə qədər gedib. Ancaq bir məsələnin məhkəmə prosesində olması, ümumiyyətlə, həmin hadisənin cinayət olduğunu sübut etmir. Qərar hələ verilməyib.

Mənə qarşı irəli sürülən ittiham yayımçı kimi bu görüntüləri göstərməyimdir. Xaricdən aldığımız üçün eyni vəziyyəti yaşayan 5-6 televiziya kanalı var. Hamımız eyni çətinliyi çəkirik. Bu reklamlar avtomatik keçir, bizim təsir imkanımız yoxdur. Mənim müdafiəm də məhz budur.

Məni mərc oyunları ilə əlaqələndirməyə çalışmaq tamamilə başqa bir niyyətdir. Hər cür böhtanın atılacağını bilirdim, amma məni mərc məsələsi ilə bağlamaq absurddur. Mən UEFA-dan matç almışam. Burada edə biləcəyim bir şey yoxdur. Buna görə də ədalətə güvənirəm.

Mənim üçün problem yoxdur, çünki ortada başqa bir şey yoxdur. Əgər desələr ki, mərc şirkəti ilə müqavilə bağlayıb, pulun yarısını alıb - buyurun, buradayam. Amma belə bir şey sübut edilə bilməz, çünki baş verməyib."

Qeyd edək ki, ittiham aktında "TV8" və EXXEN platformalarında yayımlanan futbol matçları zamanı qanunsuz mərc saytlarının reklam edildiyi iddia olunur. İşlə əlaqədar ümumilikdə səkkiz nəfər təqsirləndirilir. Acun Ilıcalı iyul ayında məhkəməyə çıxacaq.