Yeddiqat "Formula-1" çempionu Mixael Şumaxerin sağlamlıq vəziyyəti ilə bağlı yeni məlumatlar üzə çıxıb. Məşhur pilot artıq verbal ünsiyyət qura bilmir və tamamilə qəyyumlarının himayəsindədir.

"EDnews" xəbər verir ki, bu barədə Almaniyanın RTL telekanalının jurnalisti Feliks Qorner danışıb. Onun sözlərinə görə, Şumaxerin durumu olduqca ağırdır və daim xüsusi qayğıya ehtiyac duyur.

"O, artıq öz fikirlərini sözlə ifadə edə bilmir və tamamilə yaxınlarının dəstəyindən asılı vəziyyətdədir", - deyə Qorner bildirib.

Hazırda Şumaxerin səhhətinə xüsusi tibbi briqada və həyat yoldaşı Korinna nəzarət edir. Onun ailəsi pilotun şəxsi həyatını maksimum dərəcədə qorumağa çalışır. Jurnalistin sözlərinə görə, Şumaxerlə ünsiyyət qura bilən insanların sayı iyirmidən çox deyil.

"Bu, düşünülmüş bir qərardır, çünki ailəsi həmişə Mixaelin maraqlarını üstün tutub və onun həyatını ciddi şəkildə qoruyub", - Qorner əlavə edib.

Xatırladaq ki, 2013-cü ilin dekabrında Meribel kurortunda xizək sürərkən Şumaxer yıxılaraq başını daşa çırpıb. O, ağır kəllə-beyin travması alaraq təcili əməliyyat edilib və süni komaya salınıb. 2014-cü ilin iyununda pilot komadan çıxsa da, səhhəti normallaşmayıb və o, əvvəlcə reabilitasiya mərkəzinə, daha sonra isə İsveçrədəki evinə köçürülüb.

2021-ci ildə yayımlanan sənədli filmdə ailə üzvləri Şumaxerin nə hərəkət edə, nə də insanlarla ünsiyyət qura bildiyini təsdiqləyiblər. Hazırda 56 yaşlı pilotun sağlıq durumu qapalı saxlanılır və onun vəziyyəti ilə bağlı yalnız yaxın çevrəsi məlumatlıdır.

Şəms Qasımlı // EDnews