Türkiyənin məşhur futbol klubu "Fənərbaxça" heyətində ciddi dəyişikliklərə başlayıb. Klubun mətbuat xidməti bu gün iki aparıcı futbolçunun komandadan ayrıldığını rəsmən açıqlayıb.
EDnews-ın məlumatına görə, İstanbul təmsilçisi kapitan Edin Ceko və serbiyalı ulduz futbolçu Duşan Tadiç ilə yollarını ayırıb. Klub onların başa çatan müqavilələrini yeniləməmək qərarına gəlib.
Hər iki oyunçu 2023-cü ilin yayında "Fənərbaxça"ya transfer olunmuş və azarkeşlərin böyük ümid bəslədiyi fiqurlar olmuşdu. Edin Ceko komandanın əsas qol ümidi, Duşan Tadiç isə yarımmüdafiədə kreativ oyunu ilə seçilirdi.
Qeyd edək ki, Ceko 2023/24 mövsümündə "Fənərbaxça"nın kapitanı kimi çıxış etmiş, həm Super Liqa, həm də Avropa turnirlərində mühüm qollarla yadda qalmışdı. Tadiç isə komandaya oyun quruculuğu və liderlik baxımından ciddi töhfə vermişdi.
Bu ayrılıqlar fonunda klubun yay transfer pəncərəsində yeni oyunçularla heyəti gücləndirəcəyi gözlənilir.
Fatimə Şükürova // EDnews
