Tanınmış kamerunlu hücumçu Vensan Abubakar karyerasını Azərbaycanda davam etdirməyə qərar verib. O, "Qarabağ" FK-nın təklifini qəbul edərək Türkiyə klublarının marağından imtina edib.

EDnews "Sabah" nəşrinə istinadla xəbər verir ki, 33 yaşlı futbolçu artıq Azərbaycan çempionu ilə ilkin razılıq əldə edib və tərəflər arasında danışıqlar müsbət istiqamətdə davam edir.

Xəbərdə bildirilir ki, Abubakarla Super Liqanın bir neçə klubu – o cümlədən orta səviyyəli, lakin ambisiyalı komandalar maraqlanıb. Lakin oyunçu "Qarabağ"ın avrokuboklarda oynamaq imkanını, sabitliyin və iddialı layihənin bir hissəsi olmağı üstün tutub.

Hazırda azad agent statusunda olan və mövsümün sonunda "Hatayspor"la yollarını ayıran Abubakarın "Qarabağ"la münasibətlərini rəsmi şəkildə rəsmiləşdirməsi an məsələsidir.

Əgər transfer baş tutarsa, bu, həm Abubakar üçün, həm də Azərbaycan çempionu üçün böyük qazanc olacaq. Kamerun millisinin sabiq üzvü "Beşiktaş", "Porto", "Al-Nassr" kimi klublarda da çıxış edib və zəngin beynəlxalq təcrübəyə malikdir. Onun iştirakı "Qarabağ"ın hücum xəttinə əlavə güc qatacaq.

Abubakarın potensial keçidi ilə "Qarabağ" UEFA turnirlərində daha ciddi ambisiyalarla mübarizə aparmağa hazırlaşır.

Fatimə Şükürova // EDnews