İranın səhiyyə, müalicə və tibbi təhsil naziri hökumətdən koronavirusla mübarizə məqsədilə 250 milyon avro vəsaitin ayrılmasını istəyib.
Bu, İranın səhiyyə, müalicə və tibbi təhsil naziri və İranın Koronavirusla Mübarizə Milli Komitəsinin sədri Səid Nəməkinin İran prezidenti Həsən Ruhaniyə ünvanladığı məktubda öz əksini tapıb.
Bu barədə EDNews nazirliyə istinadən məlumat verir.
S.Nəməkinin sözlərinə görə, təxminən 20 min çarpayı və tibb işçisi üçün tibbi geyim, maska və tibbi ləvazimata təcili ehtiyac var.
Nəməki əlavə edib ki, cari İran ilində (21 mart 2019-dan başlayaraq) payız fəslində H1N1 qripinin yayıldığı vaxtda və digər sahələrə (yaz fəslində baş verən sel və daşqınlara görə) 600 milyon avro vəsait ayrılmışdı.
Qeyd edək ki, İran Səhiyyə, Müalicə və Tibbi Təhsil Nazirliyi ötən günədək (16 mart) 14 991 nəfərin yeni koronavirusa yoluxduğunu, 853 nəfərin öldüyünü, 4 996 nəfərin sağaldığını təsdiqləyib. (trend)