Yaponiyada keçmiş baş nazir Sindzo Abenin öldürülməsi fonunda parlamentin yuxarı palatasına seçkilər keçirilir.
Ednews "Kyodo News"a istinadən xəbər verir ki, hər üç ildən bir seçkiyə gedən yapon seçiciləri Şura Palatasının 124 yeni üzvü üçün səs verəcəklər. Ümumilikdə Yaponiya parlamentinin yuxarı palatasında 245 deputat təmsil olunur.
Rəsmi olaraq, deputatlığa namizədlərin seçki kampaniyası iyulun 9-na keçən gecə başa çatıb.
Yaponiya parlamentinin yuxarı palatasının üzvləri 6 illik müddətə seçilir.
Namizədlərdən 30 faizindən çoxu qadınlardır ki, bu da tarixdə ən yüksək göstəricidir.
Hazırkı baş nazir Fumio Kişidanın rəhbərlik etdiyi Liberal-Demokrat Partiyası (LDP) və onun tərəfdaşı "Komeito" Partiyası hazırda yuxarı palatada 137 yerə malikdir. Konstitusiya Demokratik Partiyasının (KDP) rəhbərlik etdiyi müxalifət cəbhəsi 95 mandata malikdir.
Bugünkü seçkilərdən sonra Yaponiyada milli seçkilər 2025-ci ilə qədər keçirilməyəcək. Gələn həftə LDP qalib gəlsə, bu partiya öz mövqeyini gücləndirəcək.