Britaniyanın BBC Yayım Korporasiyası və “Evening Standard” qəzeti çirkli pulların yuyulmasında ittiham olunan azərbaycanlı iş adamına qarşı məhkəmədə qalib gəlib.
Ednews xəbər verir ki, iş adamının adı çirkli pulların yuyulması əməliyyatı ilə bağlı aparılan istintaq işində hallanır.
Məhkəmə bu şəxsin adının açıqlanmamasına qərar verib: lakin BBC və "Evening Standard" bunu qəbul etməyib və London Ali Məhkəməsində iddia qaldırıb.
Ali Məhkəmə iddianı təmin edib və iş adamının adının Böyük Britaniyanın Milli Cinayət Agentliyi tərəfindən açıqlanmasına qərar verib. Lakin iş adamının apellyasiya şikayəti vermək hüququ olduğu üçün hökm dərhal icra olunmayacaq.
Eyni zamanda, adıçəkilən iş adamının Azərbaycan Milli Məclisinin deputatı Cavanşir Feyziyevlə bağlı olduğu bildirilir. Xatırladaq ki, Cavanşir Feyziyev Londonda çirkli pulların yuyulmasında təqsirli bilinib və Milli Cinayət Agentliyinin qaldırdığı iddianı geri götürmək üçün 5,7 milyon funt sterlinq ödəməyə razılaşıb.
2022-ci ilin yanvarında London məhkəməsi Feyziyevin həyat yoldaşı Pərvanəyə, oğlu Orxana və qohumu Elman Cavanşirə qarşı hökm çıxarıb.
Hökmə əsasən, bu şəxslərin Böyük Britaniyadakı bank hesablarına çirkli pulların yuyulması sxemi ilə 15 milyon funt sterlinq köçürülüb. Bu pulun 5,7 milyon funt-sterlinqi müsadirə edilib. Qalanı isə sahiblərinə qaytarılıb.
Yeni məhkəmə istintaqında adı hallanan tanınmış azərbaycanlı iş adamı Feyziyevlərin işi üzrə təqsirləndirilənlər sırasında olmasa da, ailə ilə müəyyən əlaqələrə malikdir.
Azərbaycanlı iş adamı özü iddia edir ki, kimliyi üzə çıxarsa, “onun imicinə və işgüzar nüfuzuna böyük və sarsıdıcı zərbə vurulacaq”. Onu məhkəmədə lord Pannik və Britaniyanın ən bahalı iki vəkili, o cümlədən Vəkillər Kollegiyasının keçmiş prezidenti Desmond Braun müdafiə edir.
BBC-ni təmsil edən Jud Bunting keçən il Ali Məhkəməyə bildirib ki, hesabata qoyulan hər hansı məhdudiyyət “ciddi şəkildə zəruri, aydın və inandırıcı sübutlarla əsaslandırılmalıdır”.
“Bu iş böyük ictimai maraq doğuran mövzuya toxunur. Araşdırma jurnalistikasına və məhkəmənin reportajlarına əsaslanan məhkəmə prosesi ictimaiyyətin mövzunu dərk etməsinə mühüm töhfə verəcək”, deyə o, qeyd edib.
İş adamı özü iddia edib ki, o, sadəcə, baxılan işdə “ikinci dərəcəli” fiqurdur. Lakin sonradan hakim onu “vacib şəxs” kimi tanıyıb.
Martın sonunda keçirilən dinləmələrdə hakim Uorbi iş adamının adının açıqlanmaması üçün heç bir əsaslı səbəb olmadığını deyib.
