Aprelin 24-də Azərbaycan Respublikasının Prezidenti İlham Əliyev Gürcüstanın müdafiə naziri Cuanşer Burçuladzeni qəbulu edərkən vurğulayıb ki, Azərbaycanla Gürcüstan arasında münasibətlər müxtəlif sahələrdə, o cümlədən hərbi sahədə uğurla inkişaf edir.

Daha sonra Dövlət başçısı və Gürcüstanın müdafiə naziri əməkdaşlıq perspektivlərini, regional təhlükəsizlik məsələlərini müzakirə ediblər. 

Bundan başqa Azərbaycan Respublikasının müdafiə naziri general-polkovnik Zakir Həsənovla görüşən C.Burçuladze Azərbaycan və Gürcüstan hökumətləri arasında müdafiə sahəsində əməkdaşlıq haqqında razılaşma imzalanıb. 

Cənubi Qafqazda iki qonşu ölkə arasında başlanan hərbi əməkdaşlıq hansı məcrada inkişaf edəcək? Bu əməkdaşlıq hansı prespektivləri ortaya qoyacaq? 

Məsələ ilə bağlı Ednews-a danışan Gürcüstan İctimai Əlaqələr İnstitutunun (GİƏİ) Beynəlxalq Münasibətlər və Təhlükəsizlik professoru Georgi Koberidze qeyd edib ki, Azərbaycan və Türkiyə Gürcüstan tərəfindən müttəfiq kimi qəbul edilir.  

“Gürcüstan və Azərbaycanın hərbi əməkdaşlığı məntiqi inkişafdır. Rusiyanın regiona müdaxiləsi həm Gürcüstanın, həm də Azərbaycanın üzləşdiyi təhlükəsizlik problemlərindən biridi”.

Georgi Koberidze həmçinin bildirib ki, iqtisadiyyatda əməkdaşlıq mühüm məsələdir. Lakin iqtisadi maraqların bir hissəsi də Cənubi Qafqazda hərbi təhlükəsizliyin tərkib hissəsidir. 

“Azərbaycan və Gürcüstana yeganə etibarlı enerji və ticarət dəhlizləri kimi baxan xarici tərəfdaşlar üçün iqtisadi təhlükəsizlik mühüm əhəmiyyət kəsb edir”.

Professor hərbi əməkdaşlığın hər iki ölkəyə olan xeyrindən də danışıb:

“Hərbi əməkdaşlıq məsələsinə gəlincə, bu, həm birgə təlimlər, həm də təhlükəsizlik sahəsində informasiya mübadiləsi demək ola bilər. Bundan əlavə, Gürcüstan və Azərbaycan arasında əlaqələrin gücləndirilməsi digər ölkələrə aydın mesaj verir ki, Cənubi Qafqazda sülh və əməkdaşlıq tamamilə mümkündür”.

Aysel Şahmar

• Tag:
• Cənubi Qafqaz
• Azərbaycan
• Gürcüstan
• Rusiya