Beynəlxalq Avrasiya Mətbuat Fondunun dəvəti ilə Bakıda səfərdə olan Niderlandlı yazıçı-publisist, BAMF-ın Niderlanddakı nümayəndəsi Henri Van Rens Real Tv-yə müsahibə verib.
Müsahibəsi zamanı araşdırmaçı –publisist Beynəlxalq Avrasiya Mətbuat Fondunun dəstəyi ilə işıq üzü görəcək Qarabağa həsr olunan kitabdan da danışıb. O, nəşrin I və II Qarabağ müharibəsinin qurbanlarına ərmağan etdiyini və son illərdir kitab üzərində çalışdığını deyib. Kitabla bağlı BAMF-ın tərəfindən yazıçıya Qarabağa olan səfərlərində, araşdırmlarında və faktların tapılmasında böyük dəstək göstərilib.
“Artıq üçüncü dəfədir Azərbaycana səfər etməyimə çox şadam. Bu, mənim üçün çox böyük məna kəsb edir. Artıq Qarabağla bağlı kitabımı tamamlayıram. Niyə Qarabağla bağlı kitab hazırlayıram, çünki biz Niderlandda Azərbaycanla, Qarabağla bağlı heç nə bilmirik. Bu, 400 min il əvvəldən bu günədək olan dövrü əhatə edəcək tarixi kitabıdır. Bu dövrdə olan hər şeyi kitaba daxil etməyə çalışmışam. Ehtimal ki, bu təxminən 420 səhifəlik böyük bir kitab olacaq. Bu, I və II Qarabağ müharibəsinin qurbanları üçün, həmçinin onların valideynləri və övladları üçün bir hədiyyədir”.
Yazıçı Azərbaycana ilk səfəri barədə maraqlı faktlardan da danışıb.
“2009-cu ildə professor Fəqan Əliyevlə tanış oldum. O, məni Azərbaycana dəvət etdi. Daha sonra isə ildə bir neçə dəfə Azərbaycana gəlməyə başladım. Demək olar ki, bütün dünyanı sayahət etmişəm. Hər yerinin özünəməxsusluğu var. Niderlanda olarkən Azərbaycan haqqında çox az məlumatım var idi. Coğrafiyası mükəmməldir. Ötən il bir dəfə Azərbaycanda oldum ad günümü də burada keçirdim. Niderlandda Qarabağ haqqında məlumat kasadlığı yaşanır. Öz ölkəm Xocalı soyqırımını tanımır. Amma hələ də niyə tanımaq istəmədiyini başa düşmürəm. Niderlanda ermənilər çoxdur”.
Henri Van Rens Niderlandın Xocalı soyqırımını tanıyacağına ümid etdiyini əlavə edib:
“Bu məsələ ilə bağlı bütün dünyanın, eləcə də Niderlandın bilməsinə ehtiyac var. Ümid edirəm ki, bir gün Niderland hökuməti Xocalı soyqırımını tanıyacaq. Təəssüf ki, sadəcə Xocalıda yox, Qarabağdakı bir çox digər yerlərdə də ermənilərə görə problemlər olub”.
Müsahibəni daha ətraflı videoda izləyə bilərsiniz:
Aysel Şahmar
