Misirin “Əl-Hivar” (Dialoq) Siyasi və Media Araşdırmaları Mərkəzində Azərbaycanın Ümummilli Lideri Heydər Əliyevin anadan olmasının 100 illiyi və Ümumdünya Ətraf mühitin mühafizəsi Günü çərçivəsində "Heydər Əliyev və dünya sülhü: Minalarla mübarizəyə giriş" adlı seminar keçirilib.
Ednews xəbər verir ki, seminarda çıxış edən ölkəmizin Misirdəki səfiri Elxan Poluxov Ümummilli Lider Heydər Əliyevin həyat və fəaliyyəti, tarixdəki rolu, onun Azərbaycan torpaqlarının Ermənistan tərəfindən işğalı zamanı vəziyyətdən çıxış yolu üçün göstərdiyi səylər haqqında geniş məlumat verib. Ulu Öndər Heydər Əliyevin dünyanın bir çox ölkələrində sülhə verdiyi töhfələrlə xatırlandığını qeyd edərək, Azərbaycanın müstəqillik əldə etdikdən sonra çətin mərhələdən çıxmasını təmin etdiyini bildirib, hakimiyyət illərində minalarla mübarizədə göstərdiyi çoxsaylı səylərə toxunaraq, onun uğurlarının Azərbaycan Prezidenti İlham Əliyev tərəfindən davam etdirildiyini söyləyib. E.Poluxov 44 günlük Vətən müharibəsi zamanı azad olunmuş torpaqlarda indiyədək qalmış mina təhlükəsi haqqında söhbət açaraq, bu ərazilərdə mina partlaması nəticəsində yüzlərlə dinc sakinin həlak olması və şikəst qalmasını bəşəriyyət qarşısında ağır cinayət kimi qiymətləndirib.
Beynəlxalq Avrasiya Mətbuat Fondunun prezidenti, ANAMA yanında İctimai Şuranın sədri Umud Mirzəyev seminara video müraciət ünvavlayıb.
O bildirib ki, Azərbaycan mina ilə çirklənən ən böyük ölkələrdən biridir.
“Ölkəmizin son 30 ildə 20 faizdən çox ərazisi işğala məruz qalıb. Bu torpaqlar minalarla çirkləndirilib. Təxminən Azərbaycan ərazisində 1 milyon yarımdan çox mina var. Beynəlxalq Avrasiya Mətbuat Fondu 20 ildir ki, Azərbaycanda mina təhlükəsizylə mübarizə proqramına qoşulub. BAMF-ın nəzdində fəaliyyət göstərən İcma Mina Aksiyası komandası regionda mina təmizlənmə fəaliyyəti göstərən əsas qurumlarından biridir”.
Sözügedən videonu təqdim edirik: