ABŞ Daxili Təhlükəsizlik Departamentinin Kəşfiyyat və Təhlil Bürosu tərəfindən hazırlanan bülletendə süni intellekt tərəfindən hazırlanan məzmunun qarşıdan gələn 2024-cü il prezident seçkiləri zamanı zərərli şəkildə istifadə oluna biləcəyi ilə bağlı paylaşım edilib.
Ednews sozcu.com-a istinadən xəbər verir ki, ABŞ Daxili Təhlükəsizlik Departamentinin ölkə daxilində hüquq-mühafizə orqanlarına göndərdiyi təhlil bülletenində generativ süni intellektin noyabrın 5-də keçiriləcək prezident seçkilərinin təhlükəsizliyini təhdid edə biləcəyi barədə xəbərdarlıq edilib.
“2024-cü il seçki dövrü irəlilədikcə, generativ süni intellekt vasitələri çox güman ki, həm yerli, həm də xarici təhlükə aktorlarına sürətlə baş verən hadisələri şiddətləndirməklə, seçki proseslərini pozmaqla və ya seçki infrastrukturuna hücum etməklə müdaxilə etmək üçün daha geniş imkanlar verəcək” - deyə məlumatda bildirilir.
Süni intellekt vasitəsilə həyata keçirilə biləcək mümkün hücumların səbəbkarlarının "Rusiya, Çin və İran" ola biləcəyi bildirilib.
Bülletendə hücumların dövlət institutlarını, ictimai bütövlüyü və demokratik proseslərə inamı sarsıtmaq məqsədi daşıyacağı vurğulanıb.
Xəyal
