Dünyaca məşhur sahibkar, “Tesla” və “SpaceX”in rəhbəri İlon Mask ABŞ Hökumətinin Effektivliyi Departamentindəki (DOGE) vəzifəsini rəsmi olaraq tərk edib.

EDnews xəbər verir ki, Mask bu barədə şəxsi “X” (keçmiş “Twitter”) hesabında paylaşım edib. O, xüsusi dövlət qulluqçusu kimi səlahiyyət müddətinin başa çatdığını və bu səbəbdən vəzifəsini tərk etdiyini bildirib.

İlon Mask paylaşımında, DOGE departamentindəki fəaliyyətinin sonlandığını elan edərək, ABŞ hökumətinin effektivliyinin bundan sonra daha da artacağına ümid etdiyini vurğulayıb:

“Vəzifəmi başa vururam. Ümid edirəm ki, DOGE departamenti bundan sonra daha da uğurlu işləyəcək.”
Qeyd edək ki, DOGE (Department of Government Efficiency) – ABŞ administrasiyasında səmərəliliyin artırılması məqsədilə yaradılan, qeyri-ənənəvi strukturlardan biridir və Donald Tramp dövründə təklif olunmuş islahat proqramlarının bir hissəsi kimi təsis edilib.

İlon Maskın bu strukturda iştirakı rəsmən məsləhətçi və məhdud müddətli dövlət qulluqçusu statusunda olub. Onun texnologiya, innovasiya və bürokratiyanın sadələşdirilməsi üzrə verdiyi tövsiyələr zaman-zaman müzakirə mövzusu olmuşdu.

Maskın istefası bəzi siyasi dairələrdə Tramp administrasiyasına və gələcək planlara dair fərziyyələrin artmasına səbəb olub.

Fatima Şükürova // EDnews