Türkiyədə prezident seçkilərinə son 46 gün qaldı. Bu zaman ərzində partiyaların namizədləri fəallıqlarını artırmağa davam edir. Bu mənada Cümhuriyyət Xalq Partiyasının lideri Muharrəm İncəni qeyd etmək yerinə düşər. M.İncənin son çıxışlarına nəzər saldıqda görə bilərik ki, hazırki prezident Rəcəb Tayyib Ərdoğan üçün bu ilki seçkilər o qədər də asan keçməyəcək. Muharrəm İncə ilə yanaşı İYİ partiyasının lideri və prezidentliyə namizəd olan Meral Akşeneri də diqqətdən qaçırmaq olmaz.
Bildiyimiz kimi seçkilərdən öncə Ədalət və İnkişaf partiyasının Milli Hərəkat Partiyası ilə ittifaqına qarşılıq olaraq digər müxalif partiyalar arasında da ittifaq yaradıldı. İttifaqa ana müxalifət partiyası hesab edilən Cümhuriyyət Xalq Partiyası, İYİ partiyası, Səadət Partiyası və Demokratik Partiya daxil oldu. Bu dördlü ittifaqı birləşdirən ortaq cəhət ondan ibarətdir ki, bu ilki seçkilər iki turdan ibarət olacaq və əgər iqtidar partiyası 50+1 səs faizi toplaya bilməsə seçimlər ikinci turda davam edəcək. Bu mənada əsas məqsəd R.T.Ərdoğanın birinci turda qələbəsinin qarşısını almaqdan ibarətdir. İkinci turda isə ikinci yerdə qərarlaşmış müxalifət partiyasına digər partiyalar aktiv dəstək göstərəcəklər.
Lakin bu ilki seçkilərdə maraqlı məqamlar da diqqəti çəkir. Ana müxalifət partiyası Cümhuriyyət Xalq Partiyasının rəhbəri K.Kılıçdaroğlu seçimlərdə qalib gələ bilməyəcəyini anlayaraq və rəhbərliyi əldən verməmək üçün M.İncəni bir növ "qurban" kimi göndərdi. K.Kılıçdaroğlunun bu məsələdə başqa məqsədi də var ki, bu da partiya daxilində ən güclü rəqibi olan Muharrəm İncəni məğlub olacağını bilə-bilə göndərərək dayağını bərkitmək istədi. Təbii ki, burada Muharrəm İncənin bunun qəbul etməsi də ayrı məsələdir. K.Kılıçdaroğlu bəlkə də ən böyük səhvi M.İncəni namizəd kimi verməklə etdi. Çünki M.İncə olduqca uzaqgörən və ağıllı siyasətçidir. Hətta deyərdim ki, M.İncə məğlub olsa belə CHP-çilərin rəğbətini qazanmaqda davam edəcək. Bunun bariz nümunəsi kimi Yalovada çıxışı zamanı işlətdiyi ifadəni göstərə bilərik. Belə ki, Rəcəb Tayyib Ərdoğana müraciət edərək belə demişdi : "Səlahəddin Dəmirtaşı azad et kişi kimi yarışaq". Təbii ki, bu olduqca riskli addım idi. Hər bir siyasətçi bu riskə getməzdi. M.İnce burada üç xətli siyasət yürüdür.
Birincisi ondan ibarətdir ki, M.İncə bir tərəfdən başa düşürdü ki, Ərdoğan terrora dəstək verən, "15 Temmuz" çevrilişində barmağı olan birini azad etməyəcək. Bu mənada o bir başa kürd xalqına xitab etdi deyə bilərik. Bununla da S.Demirtaşa veriləcək səslərin yönünü dəyişdirməyə cəhd etdi.
İkincisi, xalqa müraciət edərək "əgər mən seçilsəm ölkədə tam demokratik şərait hökm sürəcək " fikrini aşılamağa çalışdı.
Bununla da bir növ Ərdoğanı dolayı yolla "diktator" kimi qələmə verdi.
Üçüncüsü isə düşünürəm ki, M.İncə bununla CHP millət vəkillərinə də "incə" mesaj göndərdi. Belə ki, əgər iqtidar uğrunda rəqabətdə məğlub olarsa CHP liderliyinə namizəd olmaq üçün də cəhdlər edir. Belə desək, heç bir xeyri olmayan K.Kılıçdaroğlunun da hakimiyyətinə son qoymaq niyyətindədir.
Rusif Məmmədov,
Qərbi Kaspi Universitetinin Tətbiqi Politologiya Mərkəzinin eksperti