İnqilabçı baş nazirin qısa vaxtda “qabında nə olduğu” üzə çıxdı.
Nikol Paşinyanın Ermənistanda hakimiyyətə gəlməsinin bir ayı tamam oldu. Bu bir ayda Paşinyanın davranışları, tutduğu siyasi kurs yaxın gələcək üçün proqnozlar verməyə əsaslar yaradıb.
Siyasi analitiklər hesab edirlər ki, ilk bir ayda Paşinyanın “qabında nə olduğu” ortaya çıxmış sayıla bilər. Onun Ermənistan üçün “Saakaşvili” ola biləcəyinə ümid edən ermənilər get-gedə ümidlərini itirirlər.
Yeni baş nazir hakimiyyətə gəldikdən dərhal sonra işğal olunmuş Dağlıq Qarabağa səfər edib və separatçı rejimi tərəf kimi danışıqlar masasına əyləşdirməyə çalışması ilə yadda qalıb. Eyni zamanda, davamlı şəkildə bir-birinə zidd açıqlamaları ilə özünü gülünc vəziyyətə salmaqda davam edir.
Ekspertlərin fikrincə, ilk bir ayda bəlli oldu ki, Paşinyan da Sərkisyanın “yolunu” getməyə çalışır, ancaq təcrübəsizliyi buna imkan vermir. Paşinyan Sərkisyanın rolunu kobud və pis formada oynayır. Deməli, yaxın illərdə nə Ermənistan normal ölkəyə çevriləcək, nə erməni gənclər normal yaşamaq üçün ölkəsinə qayıdacaq, nə də Qarabağdan Ermənistana daşınan əsgər meyitlərinin ardı kəsiləcək.
Paşinyanın yüksək vəzifələrə təyin etdiyi kadrların çoxunun Qərbyönümlü gənclər olması və məxməri inqilabla hakimiyyətə gəlməsi onun Ermənistanın “Saakaşvilisi” olacağı demək deyil. Nə qədər ki, Ermənistan Azərbaycan torpaqlarından çəkilməyib Ermənistanın iqtisadiyyatı irəli gedə bilməyəcək. Hazırkı vəziyyətdə Ermənistanın iqtisadi resursları da inkişaf üçün yetərli deyil. Paşinyanın ölkə iqtisadiyyatını ayağa qaldıra biləcəyi ilk ayda aydın olmağa başlayıb. Paşinyan hökumətinin 5 illik proqramı açıqlandı. Məlum oldu ki, Sərkisyanın 10 illik hakimiyyəti dövründəki proqramından elə də fərqli deyil. Bu proqram isə son 10 ildə Ermənistanı bataqlığa salıb.
Ermənistan hazırda çox zəif bir durumdadır. Reallıq budur ki, Ermənistanda hələ də sabit hakimiyyət yoxdur, yaxın zamanlarda da sabit hakimiyyət qurulmayacaq. Ən azından növbədənkənar parlament seçkiləri keçirilməyənə qədər bu olmayacaq. Bu proseslərin içərisində Serj Sərkisyan hakimiyyəti çox ciddi müqavimət göstərir. Səhnədən gedən bu hakimiyyət yenidən iqtidara qayıtmağa cəhdlər edəcək. Demək, bundan sonra vəziyyət daha da gərginləşəcək.
Paşinyanın hakimiyyətinin ilk ayında Azərbaycan ordusu Naxçıvan istiqamətində irəlilədi. Ermənistanla sərhəddə yerləşən və 1992-ci ildən Azərbaycanın nəzarətindən çıxan Günnüt kəndi bu yaxınlarda Azərbaycan ordusunun nəzarətinə keçdi. Ümumilikdə tam 1200 hektar ərazinin, yüksəkliyin Azərbaycan silahlı qüvvələrinin nəzarətinə keçdiyi deyilir. Bu faktor da ermənilər tərəfindən inqilabçı baş nazirin aktivinə ilk ayda yazılan minuslardan biri olaraq qəbul ediləcək.
Milli Məclisin deputatı Elman Nəsirov qeyd etdi ki, inqilabdan sonrakı ilk vaxtlarda taktiki baxımdan Paşinyan özünü uduşlu vəziyyətdə hiss edə bilərdi və bu təbii idi. Çünki ilk vaxtlarda inqilab eyforiyası öz təsirini göstərirdi. Lakin qısa zamanda görünməyə başladı ki, strateji baxımdan onun məğlub səviyyəsinə enişini şərtləndirən bir sıra ciddi amillər var: “Ermənistanı və qondarma ”Qarabağ rejimi"ni sistemli iflasa gətirən əsas səbəb Azərbaycan torpaqlarının işğalı faktı ilə bağlıdır. Elə bu səbəbdən də Ermənistan bumeranq effekti ilə üzləşib və Azərbaycanın iqtisadi, enerji və nəqliyyat blokadası siyasətinin hədəfindədir. Bu bir ayda göründü ki, Paşinyan bu səbəbin aradan qaldırılması və bununla da üzücü təcrid siyasətindən qurtulmaq naminə hələ ki, heç bir addım atmır. Hətta bir çox hallarda zorla hakimiyyətdən saldığı Sərkisyandan çox “Sərkisyan” olmaq istəyir. Əksini düşünənlər son günlər ərzində Paşinyanın Ermənistan-Azərbaycan, Dağlıq Qarabağ münaqişəsinin həlli ilə bağlı səsləndirdiyi aşağıdakı absurd fikirlərə diqqət yetirsinlər: Münaqişənin tənzimlənməsi prosesində qondarma “Dağlıq Qarabağ rejimi” tamhüquqlu tərəf kimi iştirak etməlidir. Bu, birinci addım olmalıdır;
Paşinyanın bu mövqeyi sülh danışıqlarını çıxılmaza salmaqdır. Bu isə Ermənistanın vəziyyətinin daha da ağırlaşacağı deməkdir.
Paşinyanın nonsens kimi qarşılanan bu mövqeyi müttəfiqi hesab olunan Rusiyada da narazılıq doğurub. Təsadüfi deyil ki, Rusiya Xarici İşlər Nazirliyinin departament rəisi Artyom Kojim Ermənistanın baş nazirinin bu fikirlərini “qeyri-konstruktiv mövqe” kimi qiymətləndirib. Eyni zamanda, Rusiyanın xarici işlər naziri Sergey Lavrov da “Nezavisimaya qazeta”nın müxbirinin “Dağlıq Qarabağ münaqişəsinin həlli prosesində müstəqil tərəf kimi iştirakının mümkünlüyü” ilə bağlı sualına cavab olaraq bildirib ki, bu məsələyə yalnız Ermənistan və Azərbaycan arasında razılaşma olacağı təqdirdə baxıla bilər. Bu məsələdə Sergey Lavrov Azərbaycanın prinsipial mövqeyi ilə yaxından tanışdır. Deməli, əslində o, Dağlıq Qarabağın danışıqlar prosesində iştirakının mümkünsüzlüyünü Ermənistana başa salıb.
Bəs, Ermənistanın yeni rəhbərliyinin düşdüyü labirintdən çıxış yolu varmı? Bəli, var. Bu yolu növbəti dəfə prezident İlham Əliyev Qafqaz Müsəlmanları İdarəsinin müqəddəs Ramazan bayramı münasibətilə təşkil etdiyi iftar mərasimində göstərdi. Dövlətimizin başçısı bildirdi ki, Ermənistanın yeni rəhbərliyi əvvəlki rəhbərliyin səhvlərini təkrar etməməlidir, konstruktiv danışıqlar aparmalıdır, Azərbaycan torpaqlarını işğaldan azad etməlidir. Bəli, bu, Ermənistanın yeganə nicat yoludur. Paşinyan bunun əksini edərsə, Sərkisyanın yolu ilə getmiş olacaq. Sonu da Sərkisyanın sonu kimi olacaq".(musavat.com)