Xankəndidə özünü hələ də hansısa qurumun “prezidenti” sayan Araik Arutunyanın istefası tələbi ilə etirazlar davam edir. Qarabağda Arutunyana qarşı etirazlar onun seçki günü Paşinyanın qərargahını ziyarət etməsi və sonradan təbrik etməsilə başlamışdı. Separatçıların başçısı belə bir addımını Qarabağ ermənilərinin Ermənistana möhtac olduqları ilə izah edib.
Arutyunyan, “Ermənistanla əlaqələr qurmadan 35 min “vətəndaşın” sosial probleminin həllini necə təsəvvür edirsiniz?” deyib və bu açıqlamasıyla maraqlı bir faktı etiraf edib. Bildiyimiz kimi, Rusiya Müdafiə Nazirliyi və separatçıların yaydığı məlumatlarda bu rəqəm bir neçə dəfə şişirdilmişdi. Bundan əlavə, hazırda hamını bir məsələ düşündürür – Qarabağda hələ də faktiki olaraq ermənilərin rəhbəri olan Arutunyan getsə, nələr baş verəcək?
Məsələ ilə bağlı Şahin Cəfərli Eurasia Diary-yə açıqlama verib.
“Arutunyan gedəcəyi təqdirdə onun yerinə böyük ehtimalla Vitaliy Balasanyan keçəcək. Əslində, müharibədən sonra Balasanyanın qondarma rejimin “təhlükəsizlik şurası”na sədr təyin edilməsilə aydın idi ki, real rıçaqları əlinə keçir. Balasanyan daha çox Rusiya ilə münasibətləri daha yaxşı olan şəxs kimi tanınıb. O, Birinci Qarabağ müharibəsində Rusiya hərbçilərinin, 366-cı alayın da köməyi ilə hərbi əməliyyatlarda çox aktiv şəkildə iştirak edib”.
Ş. Cəfərli bildirib ki, müharibədən sonra Ermənistan hökumətinin Qarabağ üzərində təsiri çox zəifləyib.
“Paşinyan hökumətinin Balasanyanla münasibətləri çox soyuqdur. Məlum olduğu kimi, hətta onlar arasında düşmənçilik münasibəti var. Hakimiyyət rıçaqları Balasanyanın əlinə keçib. Arutunyan bu vəzifədən kənarlaşdırılarsa, aydındır ki, Dağlıq Qarabağda separatçı və qondarma rejiminin bütün idarəçilik səlahiyyətləri Balasanyana keçəcək. Real vəziyyət belədir ki, rus sülhməralılarının cavabdehlik zonasında əsas güc və iradə sahibi aydındır ki, Rusiyadır. Onlar nə desə, o da olacaq”, -deyə politoloq qeyd edib.
O, Arutunyanın Qarabağ erməniləri haqda açıqlaması ilə bağlı danışarkən deyib ki, Qarabağ ermənilərinin yaşam şərtləri daha çox Ermənistanın dəstəyinə bağlıdır: “Ermənistan yardım etməsə, Qarabağ ermənilərinin öz həyatını təmin etmə imkanları çox minimaldır. Müharibədən əvvəl, işğal dövründə bir çox əkin sahələri, tarlalar ermənilərin nəzarətində idi və müəyyən qədər özlərini təmin edə bilirdilər. Amma Azərbaycan öz torpaqlarını geri qaytardıqdan sonra bunların hamısı ermənilərin əlindən çıxdı və indi daha çox kənar dəstəyə möhtacdırlar.
Arutunyanın açıqladığı 35 min rəqəmi əslində maraqlı məqamdır. Bilirsiz ki, Rusiya sülhməramlıları müharibədən sonra erməniləri bölgəyə geri qaytarırdı və müntəzəm olaraq rəqəmlər açıqlanırdı. Sonuncu dəfə Rusiya təqribən 55 min Qarabağlı erməninin geri qayıtdığını açıqlamışdı, amma indi biz görürük ki, burada 35 min erməni var. Daha əvvəl BMT-nin müvafiq strukturu da burada 30-35 min erməninin olduğunu bildirmişdi. Bu səbəbdən Arutunyanın bunu səsləndirməsi maraqlıdır və reallığa da uyğundur”.
Gülnar Səlimova