Sovet imperiyası dağıldıqdan sonra müstəqillik əldə edən Azərbaycan bütün dünya dövlətləri ilə öz əlaqələrini qurmağa başladı.
Xarici siyasətində Azərbaycan üçün bütün istiqamətlər əsas olsa da, müsəlman ölkələri ilə münasibətlər Bakı üçün həmişə prioritet olub. Ərəb Liqası və İslam Konfransı ölkələri ilə diplomatik, iqtisadi və mədəni əlaqələri hər il genişləndirəm ölkəmiz bir neft ixracatçısı kimi Körfəz ölkələrinin və Şimali Afrikadakı ərəb-müsəlman dövlətləri ilə çox sıx əlaqələr qurdu.
Müsəlman dünyasının bütün tale yüklü problemlərinin həllinə öz töhfəsini Azərbaycanın hətta bəzi ərəb dövlətləri ilə xüsusi sıx münasibətləri yarandı. Bu ölkələrdən ən əsasının Qətər olduğunu desək, heç də yanılmarıq. Çünki dünyanın ən zəngin və inkişaf etmiş ölkələrindən olan Qətərin rəhbərliyi ilə Azərbaycan rəhbərliyi arasında sıx dostluq əlaqələrinin təməli hələ mərhum prezident Heydər Əliyevin vaxtında atılmışdı. Daha sonra İlham Əliyevin prezidentliyi illərində bu möhkəm təməllər üzərində sıx dostluq münasibətləri yarandı. Qətər əmiri Təmim bin Həməd Al Tani ilə dəfələrlə görüşən İlham Əliyev bu zəngin ölkənin Azərbaycanla bütün beynəlxalq tribunalarda və siyasi platformalarda bir-birini necə müdafiə etdiyindən danışmışdır. Qətər əmiri də öz növbəsində həmişə Azərbaycanın ərazi bütövlüyünü dəstəklədiklərini vurğulamış və Qətər xalqının həmişə Azərbaycanın yanında olduğunu bildirmişdi.
Azərbaycan-Qətər diplomatik əlaqələri 14 sentyabr 1994-cü ildə qurulub. Hər iki ölkənin geniş tərkibli diplomatik missiyası Bakıda və Dohada strateji münasibətlərimizin daha da möhkəmlənməsi üçün öz fəaliyyətlərini davam etdirirlər. Azərbaycanın Qətərdəki səfiri Rəşad İsmayılov ölkəmizin xaricdəki elçiləri içərisində ən fəallarından biridir. Dohadakı səfirliyimizin təşəbbüsü və təşkilatçılığı ilə mütəmadi olaraq Azərbaycanı tanıdan, mədəniyyətimizi, ədəbiyyatımızı və elmimizi təbliğ edən müxtəlif kütləvi tədbirlər, sərgilər, dəyirmi stollar və digər mərasimlər təşkil olunur. Qeyd edək ki, Qətərin Azərbaycandakı fövqəladə və səlahiyyətli səfiri Feysal bin Abdullah Al Hinzab cənabları iki ölkə arasındakı əlaqələrin möhkəmlənməsinə öz töhfələrini verməkdədir. Səfir Feysal bin Abdullah Al Hinzab cənabları Azərbaycan Dövlət Xəbərlər Agentliyinin (Azərtac) idarə heyətinin başçısı Aslan Aslanovla görüşüb. Görüşdə Azərbaycan və Qətər arasında əməkdaşlıq əlaqələrini müzakirə ediblər. Bununla yanaşı cənab səfir «APA» xəbərlər agentliyinin müdiri xanım Vüsalə Mahir qızı və « Trend» xəbərlər agentliyinin müdiri cənab İlqar Hüseynovla da görüşüb maraq doğuran məsələləri müzakirə ediblər.
Bildiyimiz kimi 12 oktyabr 2020-ci ildə Azərbaycandakı diplomatik korpusun rəhbərləri, səfirlər, hərbi attaşelər və beynəlxalq təşkilatların ölkəmizdəki nümayəndəliklərinin rəhbərləri Gəncəyə səfər ediblər. Qətər Dövlətinin Azərbaycandakı səfiri Feysal bin Abdullah Həməd Abdullah Al Hinzab Gəncə şəhərinə səfəri zamanı jurnalistlərə açıqlamasında bildirib ki, Qətər mülki əhalinin hədəfə alınmasının əleyhinədir. Səfir bildirib ki, qardaş ölkə olan Azərbaycanın ərazi bütövlüyünü və suverenliyini dəstəkləyirik. Azərbaycanın tarixi və mədəniyyət paytaxtı Şuşaya da səfər edən cənab səfir Şuşaya gələrkən yolboyu şahidi olduğuqları tikinti-quruculuq işlərinin sürətinin onları çox sevindirdiyini deyib.
Cənab səfirin energetika naziri Pərviz Şahbazov ilə görüşünü xüsusi qeyd etmək lazımdır. Görüşdə energetika sahəsində ikitərəfli münasibətlərin inkişaf perspektivləri və gələcək əməkdaşlıq imkanları müzakirə edilib. Görüşdə enerji keçidi prosesində təbii qazın atmosferə daha az karbon emissiyası atması nəzərə alınaraq keçid yanacağı kimi vacib rolu qeyd olunub. İki ölkə arasında bərpaolunan enerji və enerji səmərəliliyi sahəsində əməkdaşlıq imkanları müzakirə edilib. Hər iki sahə üzrə ölkəmizdə qanunvericilik bazasının təkmilləşdirilməsi istiqamətində görülmüş işlər haqqında məlumat verilib.
Qətərin dünyaca məşhur media korporasiyası Əl-Cəzirə müharibə dövründə Azərbaycanın haqq səsinin dünyaya çatdırılması üçün bir sıra reportajlar və proqramlar hazırladı. Qətər şirkətləri torpaqlarımız azad olunandan sonra ölkəmizə sərmayə qoymağa hazır olduqlarını bəyan etdilər. Qardaş Qətər dövlətinin və onun xalqının Azərbaycanın ən əsas həssas probleminə bu cür münasibəti millətimizin qəlbində bu ölkəyə qarşı xüsusi məhəbbət yaradır.
Biz Azərbaycan prezidenti İlham Əliyevin azad olunduqdan sonra səfər etdiyi Şuşadakı erməni vəhşiləri tərəfindən dağıdılmış məscidin fonunda etdiyi çıxışı heç vaxt unutmamalıyıq.
"Ermənistan müsəlman ölkələri ilə heç vaxt dost ola bilməz. Axı bu müqəddəs məscidi bu günə qoyanlarla necə dost olmaq olar? Bu riyakarlıqdır! Ermənistanla dost olan müsəlman ölkələri öz xalqları qarşısında cavab versinlər".