“Azərbaycan Dəmir Yolları” Qapalı Səhmdar Cəmiyyətinin rəisi Cavid Qurbanov bildirib ki, Bərdə-Ağdam dəmir yolu xətti tamamlandıqdan sonra Xankəndi istiqamətində dəmir yolunun çəkilməsi nəzərdə tutulur.
Aydındır ki, Xankəndiyə dəmir yolunun çəkilməsi rayonun Azərbaycanın nəzarətinə keçməsi anlamına gəlir. Lakin nəzərə alınsa ki, qanunsuz erməni silahlıları hələ də bölgədən çıxarılmayıb, o zaman Xankəndiyə dəmir yolunun çəkilməsi mesajı nə məna verir?
Politoloq Elxan Şahinoğlunun sözlərinə görə, Şuşa istiqamətində də layihələndirmə işləri gedir.
“Cavid Qurbanovun mövzuyla bağlı sonuncu cümləsi də maraqlıdır: “Amma tikinti işlərinə nə zaman başlanılacağını deyə bilmərəm. Nə zaman qərar verilsə, ondan sonra işlərə başlanılacaq”.
“Əlbəttə, Xankəndiyə dəmir yolunun çəkilməsi böyük hadisə sayıla bilər. Bu o deməkdir ki, Xankəndi Azərbaycanın nəzarətinə keçib və vətəndaşlarımız bu şəhərə rahat gedib-gələcəklər. Cavid Qurbanovun Xankəndiyə dəmiryolunu çəkilməsiylə bağlı verdiyi açıqlama ermənilərə mesaj əhəmiyyəti daşıyır ki, biz şəhərimizə qayıdacağıq. Ancaq təəssüf ki, bugünkü reallıq fərqlidir”, - deyə, politoloq qeyd edib.
Ekspert hesab edir ki, Xankəndiyə dəmiryolunun çəkilməsi və gediş-gəlişin bərpası üçün birincisi, bölgədəki separatçılar tərksilah olunmalıdırlar, ikincisi bölgədəki ermənilər Azərbaycan qanunlarına tabe olmalıdırlar.
“Bu ikisi reallaşmadan Xankəndiyə nə dəmir yolu çəkilə, nə də Azərbaycan vətəndaşlarının Xankəndiyə gediş-gəlişi təmin oluna bilər. Təsadüfi deyil ki, Cavid Qurbanov sonda özünü sığortalayan “dəmiryolu ilə bağlı nə zaman qərar verilsə, ondan sonra işlərə başlanılacaq” cümləsini işlədib. Elə əsas da bu qərara şərait yaradacaq çalışmaların sürətləndirilməsidir”, - deyə E. Şahinoğlu qeyd edib.
Topçubaşov Mərkəzinin direktoru Rusif Hüseynov EDNews.net-ə açıqlamasında bildirib ki, ümumiyyətlə, yol infrastrukturunun, özəlliklə dəmir yollarının çəkilişi uzunmüddətli perspektivlərə hesablanan strateji layihələrdir.
“Sözügedən açıqlama ilə rəsmi Bakı, güman ki, yaxın gələcəkdə Xankəndinin də reinteqrasiyası üçün zəmin hazırladığını göstərmək niyyətindədir. Çünki erməni tərəfi və bir sıra başqa güclər hələ də Qarabağ məsələsini yarımçıq iş kimi göstərmək və konflikti hələ də saxlamağı hədəfləyirlər".
Politoloq qeyd edib ki, bu açıqlama ilə Azərbaycan tərəfi bir daha təkrar edir ki, Qarabağ müharibəsi bitib və Qarabağ artıq Azərbaycanın daxili məsələsidir".
Gülnar Səlimova
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır
6.3.4. ictimai və dövlət maraqlarının müdafiəsi