"İran ABŞ-dən İslam Respublikasına qarşı yeni "aqressiya aktlarının" olmayacağına dair rəsmi zəmanət almaq istəyir".
“EDnews” xəbər verir ki, bu barədə İranın xarici işlər nazirinin müavini Məcid Təxt-Ravançi BBC-yə müsahibəsində bildirib.
Onun sözlərinə görə, Tehran Vaşinqtonla aparılacaq mümkün danışıqlar fonunda İran obyektlərinə növbəti hücumların baş verib-verməyəcəyini bilməlidir:
"Danışıqlar aparıldığı bir vaxtda İrandakı hədəflərinə yenidən hücum ediləcəksə, bunun mahiyyətini anlamağa borcluyuq".
Məcid Təxt-Ravançinin sözlərinə görə, ABŞ İranla nüvə proqramı üzrə danışıqları bərpa etməyi təklif edib. Nazir müavini əlavə edib ki, ABŞ vasitəçilər yolu ilə İrana "ölkədə hakimiyyət dəyişikliyi planlarının olmadığını" bəyan edib.
Həmçinin qeyd olunub ki, Tehran Vaşinqtonun "İranda rejim dəyişikliyi məqsədilə" ali lider Əli Xameneiyə qarşı hərbi zərbə endirməyi planlaşdırmadığına dair məlumat alıb.
Xatırladaq ki, İsrail 13 iyun gecəsi İrana qarşı hərbi əməliyyata başlayıb. Təxminən bir sutkadan sonra İran cavab zərbələri endirib. Sonrakı günlərdə də tərəflər qarşılıqlı olaraq bir-birini atəşə tutmağa davam ediblər. İyunun 22-də ABŞ də münaqişəyə qoşularaq İsfahan, Fordo və Natanzdakı nüvə obyektlərini bombalayıb. İyunun 23-də Tehran ABŞ-nin Yaxın Şərqdə ən böyük hərbi hava bazası olan Qətərdəki "Əl-Udeyd" bazasına raket zərbəsi endirib. Daha sonra Amerika prezidenti Donald Tramp İsrail və İranın atəşi tamamilə dayandırmağa razılaşdıqlarını bəyan edib. İyunun 24-də atəşkəs qüvvəyə minib.
