Rusiya ilə Ukrayna arasında davam edən gərginlikdən sonra Rusiya rəsmiləri bu həftə Avropaya ardıcıl diplomatik səfərlər edib. Öncə Cenevrədə, daha sonra Brüsseldə baş tutan görüşdə tərəflər ortaq dil tapmağa çalışıblar.
Qeyd edək ki, bu uzun-uzadı davam edən diplomatik burulğanda Avropanın nə ən böyük diplomatik klubu, nə də hər hansı bir formal rolu olub. Buna baxmayaraq Aİ rəsmiləri Kremlin Ukraynanı işğal edəcəyi təqdirdə, Rusiyaya qarşı mümkün sanksiyalara hazır olduğunu hər məqamda dilə gətirib.
Lakin bu dəfə Aİ danışıqlarda passivlik nümayiş etdirib. Hətta bu barədə Fransanın məşhur qəzeti olan “Le Monde” “Avropa kənarda qaldı” və ən maraqlısı Aİ Siyasi Məsələlər və Təhlükəsizlik Siyasəti üzrə ali nümayəndəsi olan Cozep Borelin “Olanlar vecimə də deyil” kimi qeyri-ciddi açıqlaması ilə manşeti aydınlandırıb.
Şərhlərdə qeyd edilir ki, Aİ Rusiyanın ona danışıqlar prosesində əhəmiyyət verməməsindən dolayı bu ifadələrdən istifadə edib. Bu bir növ Aİ-nin incik düşməsi kimi də anlaşılır. Göründüyü kimi ABŞ onun proseslərdə koordinator kimi iştirakını həllidici hesab etsə də, Aİ bunu rədd edib.
Cozep Borelin işlətdiyi ifadə və proseslərdə Aİ-nın kənarda qalması ilə bağlı türkiyəli siyasi analitik Göktuğ Çalışqan EDNews.net -ə açıqlama verib.
“Təxminən bir həftə əvvəl Avropa İttifaqının Ukraynaya səfəri zamanı Cosep Borel Rusiyanın mövqeyinə qarşı açıqlamalar vermişdi. Buna uyğun olaraq Aİ Rusiyanın hücumuna cavab olaraq ağır sanksiyalar tətbiq edəcəyi barədə sarı kart göstərib. Təbii ki, Avropa İttifaqı daxilində fərqli yanaşmalar olacaq. Lakin son illər daxili müzakirələr səbəbindən Aİ-nin xarici məsələlərə reaksiyaları gecikir və ya fərqli fikirlər səsləndirir. Bu səbəbdən Rusiya xarici işlər naziri Lavrov Aİ-ni onun məsələyə bu cür yanaşmasından dolayı etibarsız tərəf adlandırıb. Cozep Borelin bu ifadəsi də məhz Rusiyanın göstərdiyi münasibətə bir qarşılıq cavabı kimi də anlaşıla bilər. Əks təqdirdə Aİ ABŞ-ın istəyi olmadan məsələdən kənarda qala bilməz. Əksinə sanksiyalarda Aİ daha çox sərt tərəf kimi özünü nümayiş etdirir”.
Elnur Ənvəroğlu