Böyük Britaniya NATO müttəfiqlərinə hərbi dəstəyini artırmağı düşünür. Bu barədə Baş nazir Boris Conson qərar verib. Məlumatda həmçinin Britaniyanın Estoniyada yerləşdirdiyi qüvvələrini ikiqat artırma ehtimalının olduğuda vurğulanıb.
"NATO müttəfiqlərini qorumaq üçün sürətli təyyarələr, döyüş gəmiləri və hərbi mütəxəssislər göndərilə bilər", - bu sözləri Baş nazir mətbuata açıqlamasında deyib. Bundan əlavə o, əsgər sayını ikiqat artırmaq və Estoniyaya müdafiə silahları göndərmək variantlarını nəzərdən keçirəcəyini deyib.
Maraqlıdır ki, ötən həftə Britaniya hökuməti Ukraynaya silah verilməsindən boyun qaçırmışdı. Hətta digər Avropa ölkələri kimi Rusiya ilə danışıqları məqbul hesab etmişdi. Bu dəfə isə Britaniya daha fərqli yanaşma sərgiləməklə, üstəlik silahlı yardımını əsirgəmədən Baltikyanı ölkələrinə dəstək verməyə hazır olduğunu deyib.
Britaniyanın belə bir addımının arxasında dayanan sirli səbəbləri öyrənmək üçün Ednews britaniyalı jurnalist Neyl Uatsonun fikirlərini öyrənib. Siyasi analitik baş nazirin bu qərarının arxasında olan bir neçə səbəbə aydınlıq gətirməyə çalışıb.
“Böyük Britaniyanın baş naziri Boris Conson ötən həftə Ukraynanın hərbi dəstək tələbini rədd etməsinə baxmayaraq, Estoniyaya 900 hərbçi yerləşdirməyi və bununla da Baltikyanı dövlətdəki Britaniya qüvvələrini ikiqat artırmağı vəd edib. Hesab edirəm ki, bunun arxasında bir neçə səbəb var. İlk növbədə, Estoniya Ukraynadan fərqli olaraq NATO üzvüdür və alyans üzvləri həmişə bir-birini dəstəkləyir”.
Söhbət əsnasınsa jurnalist digər Avropa ölkələrinin də proseslərdə iştirakının əsas məqamlarına toxunub.
“Fransa da bu yaxınlarda Rumıniyaya dəstək vəd edib. Əgər tələb yaranarsa silahlar dərhal lazımi ünvanına göndərilcək. İkincisi, Conson bu addımı atmaqla "Kremlə bir mesaj" göndərməyə çalışır. Bu, Ukrayna ilə bağlı davam edən və gərginləşən vəziyyətə, eyni zamanda Rusiyanın Avropada Şərq ekspansiyasına dair ambisiyalarına aiddir. Nəhayət, burada geosiyasi məqamlarda rol oynayır. Çünki Estoniya Qərbi Avropaya çox yaxındır və bütün Baltikyanı ölkələrdə olduğu kimi, Estoniya da Sovet İttifaqına çox gec daxil olub və Ukraynadan fərqli olaraq heç vaxt tam sovetləşməyib. Bu səbəbdən də Qərbin tam müstəqil olaraq qalmasını təmin etmək Britaniyanı maraqlandırır”.
Qeyd edək ki, Böyük Britaniyanın NATO müttəfiqlərinə əlavə hərbi dəstək təklifi gələn həftə Brüsseldə danışıqlar zamanı yekun müzakirə ediləcək. Britaniya hökumətinin məlumatına görə, Böyük Britaniyanın Estoniyada 900-dən çox hərbi qulluqçusu var. “Orbital əməliyyatı” çərçivəsində Ukraynada 100-dən çox Britaniya hərbçisi, Polşada isə təxminən 150 nəfərdən ibarət eskadrilya yerləşdirilib.
Bu həftənin əvvəlində Polşanın baş naziri Mateuj Moravieçki “El Mundo” nəşrinə müsahibəsində bəyan edib ki, Avropa İttifaqı Kiyevə hərbi yardımın həcmi və ya Ukrayna ətrafında vəziyyətin gərginləşəcəyi təqdirdə Rusiyaya qarşı potensial sanksiyalar barədə yekdil deyil.
Elnur Ənvəroğlu