Azərbaycanla İran ötən gün tarixi sənəd imzalayıblar. Tərəflər arasında bağlanan anlaşma memorandumuna əsasən İran ərazisindən keçməklə Azərbaycanın Şərqi Zəngəzur iqtisadi rayonu ilə Naxçıvan Muxtar Respublikası arasında yeni kommunikasiya bağlantıları yaradılacaq.
Bununla bağlı millət vəkili Arzu Nağıyev Ednews-a şərh verib.
Millət vəkili bildirib ki, İran İslam respublikası ilə bağlanan sənəd çox mühüm tarixi əhəmiyyət daşıyır.
“Bu həm də regionda “3+3” formatında əməkdaşlıq üçün müxtəlif dövlətlərin cəlb edilməsinin, eyni zamanda İranın bu proseslərdə iştirakının labüd olmasını yenidən gündəmə gətirib. Ermənilər müharibədən il yarım sonra Zəngəzur dəhlizi ilə bağlı müxtəlif bəyanatlar versə də birmənalı şəkildə onun icra mexanizmini tapa bilmədilər və bununla da özləri təcrid oldu”.
O, qeyd edib ki, Naxçıvan və Azərbaycanı birləşdirən bu dəhliz İrandan, eyni zamanda Arpaçay üzərindən keçərək hər gün təxminən 1000-ə yaxın avtomobilin giriş-çıxışını tam təmin edə biləcək.
“Bundan başqa, həmin dəhliz vasitəsilə Türkiyəyə, oradan isə Avropaya çıxış təmin olunacaq. Bu, Azərbaycan Prezidentinin birmənalı şəkildə apardığı xarici siyasətin bariz nümunəsidir və bu uğurlu diplomatiya bir qələbə kimi qeyd olunmalıdır. Burada əsas məqam isə dəhlizin Ermənistansız işləməsidir. Ermənistan bu proseslərdə özünü təcrid halına saldı. Çünki istər şərqlə qərb, istərsə də şimal ilə cənub arasında olan bu yollar Ermənistan ərazisindən keçsəydi onun tənəzzülə uğramış iqtisadi vəziyyəti müəyyən qədər düzələ bilərdi. Burada qonşuluq siyasəti də həll ola bilərdi. Lakin Ermənistan bu addımı atmadı”.
Siyasi xadim bildirib ki, bu baxımdan Azərbaycanın belə bir addımı, eyni zamanda İran tərəfindən bunun müsbət qarşılanması və memorandumun imzalanması təkcə regional deyil, beynəlxalq daşınmalarda da ən mühüm əhəmiyyət kəsb edən logistik layihədir.
“Düşünürəm ki, məhz diplomatiyamızın səyi nəticəsində bütün dövlətlər, regional və beynəlxalq qurumlar bunu bəyənəcək şəkildə şərh etməlidirlər. Bu, cənab Prezidentin başlatdığı islahatların davamıdır və bundan sonra da “3+3” formatının davam etdirilməsi labüddür”.
Qeyd edək ki, ötən gün Azərbaycanla İran arasında iqtisadi, ticarət və humanitar sahələr üzrə Dövlət Komissiyasının 15-ci iclasın yekununda tərəflər arasında “İran İslam Respublikasının ərazisindən keçməklə Azərbaycan Respublikasının Şərqi Zəngəzur iqtisadi rayonu ilə Naxçıvan Muxtar Respublikası arasında yeni kommunikasiya bağlantılarının yaradılması haqqında anlaşma memorandumu” imzalanıb.
Bundan əlavə ölkələr arasında “İqtisadi, ticarət və humanitar sahələrdə əməkdaşlıq üzrə Dövlət komissiyasının 15-ci iclasının Protokolu” imzalanıb.
Gülnar Səlimova