Ermənistanda son zamanlar millətçilik dalğası və revanşizm meyilləri get-gedə güclənməkdədir. Bunu ölkədə baş verən son proseslər və müxalif liderlərin bəyanatları aydın sübut edir.
Erməni mətbuatının məlumatına görə, Ermənistanın sabiq prezidenti və Qarabağ klanının rəhbəri Robert Köçəryan erməni silahlı birləşmələrinin 1992-ci ildə Azərbaycanın Şuşa şəhərini işğal etməsi ilə bağlı tvit paylaşıb. O, qeyd edib ki, tarixi qələbələrimizi yada salmaqla yeni qələbələr üçün yaşamalıyıq.
Bununla bərabər, İrəvanda ardı-arası kəsilməyən kütləvi nümayişlər keçirən radikal müxalifətin son nümayişində erməni millətçiliyini əks etdirən milli nəğmələr və musiqilər səsləndirilib, o cümlədən Şuşanın işğalı və işğal altındakı dövr ilə bağlı tarixi xatirələr nümayiş etdirilib. Sonda isə milli şüarlar adı altında yürüyüş keçirilib.
Eyni zamanda, xaricdə erməni diasporası tərəfindən maliyyələşən və erməni kilsəsinin ideoloji dəstəyini alan VoMA terror təşkilatının fəaliyyəti xüsusi diqqət çəkir. Sosial şəbəkələrdə yayılan məlumatlara əsasən, İkinci Qarabağ müharibəsindən sonra bu təşkilat mütamadi şəkildə erməni gəncləri arasında hərbi təlimlər həyata keçirir, eləcədə həm Ermənistanda, həm də Qarabağda erməni əhalisinin silahlanması və yeni müharibəyə hazır olması ilə bağlı çağırışlar edir.
Ermənistanda revanşist meyillər nəyə dəlalət edir? Bu kimi hallar erməni xalqına daha hansı fəlakətlər gətirəcək?
Politoloq Zərdüşt Əlizadənin sözlərinə görə, erməni millətçilərinin səs-küyü toyuğu kəsilən uşağın ağlamasına bənzəyir. O, Ednews - a açıqlamasında İrəvanda millətçilikyönümlü nümayişlərin bütün erməni xalqını əhatə etmədiyini qeyd edib.
“ Erməni əhalisinin əksəriyyəti radikal millətçilərin hərəkətlərinə kəskin tənqidi mövqe ilə yanaşır, hətta onları istehza edir. Qaldı ki, son nümayişlər ilə bağlı öz şəxsi münasibətimə, burada sizə bir xalq rəvayəti danışım. Deməli, bir uşağın toyuğunu kəsirlər, sonra həmin toyuğu bişirib yeyirlər. Uşaq da ağlayır ağı deyir: Mənim toyuğum ağ idi, dünən bu vaxt sağ idi. Səni görüm yanasan toyuq kəsən, səni odlanasan toyuq yeyən. İndi bu erməni millətçilərinin özlərinin dırnaqarası qələbəsini yada salması uşağın toyuq üçün ağlamasına bənzəyir. Onlar bu əməllərini davam etdirməklə heç nəyə nail ola bilməyəcəklər. Erməni xalqı öz tarixi qələbəsinin anatomiyasını nəzərdən keçirsə yaxşı olar. Bu xalq hələ də anlaya bilmir ki, erməni ordusu Qarabağda zəfər çalmayıb, bu regionda gedən müharibə Rusiyanın siyasəti idi. Moskva bölgəni nəzarətdə saxlamaq və ona tabe olmayan Azərbaycanı cəzalandırmaq üçün qat-qat zəif olan Ermənistana siyasi, hərbi və maliyyə dəstəyi verdi. Nəticədə Azərbaycanı məğlub, Ermənistanı isə qalib tərəfə çevirdilər”.
Politoloq əlavə edib ki, erməni millətçiləri nağıl danışmaqla, milli mahnılar oxumaqla özlərini səfeh vəziyyətinə qoyurlar.
“Ermənistanın məğlubiyyətə düçar olması artıq bir gerçəklikdir. Azərbaycan ordusu işğalçıları darmadağın etməklə Qarabağı azad etdi. Rusiya sülhməramlı qüvvələrinin nəzarəti altında olan əraziləri də qaytarmağa hazırlaşırıq. Ermənistan ordusunun yenidən güclənməsi üçün heç bir maddi və fiziki imkanları yoxdur, heç iradə də yoxdur. Ona görə də rəsmi İrəvan real vəziyyətlə barışıb Azərbaycan və Türkiyə ilə münasibətlər qurmalıdır. Qərb və Rusiya bunu qəbul edir. Lakin Moskva Qarabağda öz ordusunu saxlamaq üçün Ermənistan və Azərbaycan arasında müəyyən ziddiyyətləri saxlamaq niyyətindədir”.
Sonda Zərdüşt Əlizadə qeyd edib ki, Azərbaycan diplomatiyasının növbəti uğuru Rusiyasız Ermənistan ilə münasibətlər qurmaq, erməni xalqını ondan heç bir təhlükə gəlməyəcəyini inandırmaq olacaqdır.
“Qarabağ klanı Rusiya imperializminin əlində siyasi alətdir. Bu klan yalnız ürək bulandırmaqdan və erməni millətinin maraqlarına ziyan vurmaqdan başqa bir şey bilmir. Ermənistan növbəti müharibəyə əl atsa, daha ağır dalana dirənəcək. Bu dəfəki şərtlər onlar üçün qat-qat pis olacaq. Çünki bizim diplomatiyanı bilən Prezidentimiz, hərbi işini mükəmməl bilən zabitlərimiz var. Azərbaycan ordusu Qarabağ müharibəsində qabiliyyətini və gücünü ortalığa qoymağa bacardı”.
Yunis Abdullayev
