10-12 iyunda Kiçik və Orta biznesin İnkişafı Agentliyi (KOBİA) və İqtisadi İslahatların Təhlili və Kommunikasiya Mərkəzinin (İİTKM) tərəfdaşlığı, Kiçik və Orta Biznesin Subyektləri və Klublarının Assosiasiyası (KOBSKA) və “ROK Expo” şirkətinin təşkilatçılığı ilə Baku Expo Mərkəzində II Türk Ticarət Sərgisi - Türk Dövlətləri Ticarət və İnvestisiya Əməkdaşlıq Forumu və Sərgisi baş tutdu. 

İyunun 12-i "Türk dünyasında medianın gücü" adlı panel iclas keçirildi. 

Tədbiri giriş sözü ilə açan Kıbrıs Türk Medyanın Azərbaycan Nümayəndəsi Serdar Serderan Kuzey Kıbrıs Türk Cümhuriyəti və iki ölkə mediasının birliyindən söz açdı. Ardınca, Passage Media Təsisçisi və baş redaktoru Nərminə Ağası çıxəş edərək, Azərbaycanın media sahəsindəki inkişafından, xüsusilə də müstəqil medianın regiondakı rolundan bəhs etdi. O, Türk dövlətləri arasında informasiya mübadiləsinin gücləndirilməsinin vacibliyini vurğulayaraq, ortaq media layihələrinin, qarşılıqlı xəbər mübadiləsinin və peşəkar təcrübə paylaşımının əhəmiyyətindən danışdı.

Davamında, çıxış üçün söz yazar, jurnalist Murat Anar 44 günlük Vətən müharibəsi dövründə türk mediasının rolundan bəhs etdi. 

"Qarabağ hər zaman bizim üşün vacib olub. Medianın rolu isə bu həqiqətin dünya ictimaiyyətinə çatdırılmasında həlledici oldu. Belə bir zamanda iki ölkə mediasının bir yumruq kimi həmrəy olması, Azərbaycanın haqq səsini beynəlxalq platformalara daşımaqda mühüm rol oynadı. Gələcəkdə də ortaq media layihələri vasitəsilə Türk dünyasının həqiqətləri birlikdə müdafiə olunmalı və informasiya sahəsindəki əməkdaşlıq daha da gücləndirilməlidir".

Son olaraq, Azxəbər media qrupunun redaktoru Hacıbəy Heydərli baş tutan sərgi və media üçün bu kimi platformaların əhəmiyyətindən danışdı. O bildirdi ki, belə tədbirlər yalnız ticarət və iqtisadi əməkdaşlıqla məhdudlaşmır, eyni zamanda informasiya mübadiləsi, ortaq dəyərlərin təbliği və medianın gücləndirilməsi baxımından da olduqca vacibdir.

İclasın sonunda tədbir iştirakçıları ilə xatirə şəkli çəkildi.

Aytac Kərimova