BMT-nin Qaçqınlarla iş üzrə Ali Komissarlığının mətbuat katibinin dediyinə görə, son iki həftədə Myanmarda məruz qaldıqları zorakılıq hallarından qaçmaq üçün Banqladeşə qaçmış Rohingya müsəlmanlarının sayı 270 000 nəfərə çatıb.
BMT rəsmisi bildirib ki, Myanmarda əksəriyyəti Rohingya müsəlmanları olmaqla minlərlə adam qətlə yetirilib.
“Rəqəmlər narahat olmağa əsas verir. Bu, o deməkdir ki, biz cavab tədbirləri görməliyik və Myanmardakı vəziyyət təcili olaraq yoluna qoyulmalıdır".
Frilans jurnalist Arman Şafiq Rohingya qaçqınlarının min bir əziyyətlə pənah gətirdikləri Banqladeşin Teknaf regionunda yaşadıqları dəhşətləri, düşdükləri real vəziyyəti əks etdirən şəkilləri və videonu Eurasia Diary-ə göndərib.
Onun Myanmar müsəlmanlarının dəhşətli vəziyyəti ilə bağlı təəssüratlarını olduğu kimi sizlərlə bölüşürük.
“Keçən həftə Rohingya qaçqınlarını görmək üçün Teknafa getdim. Bu həyatımın ən çətin səfərlərindən idi. Ora hər gün minlərlə insan axın edir. Bu insanlar Banqladeşə çatana kimi 7-9 günlük yol qət etməli olur. Yolda heç yemək də yemirlər. Ancaq ağacların yarpaqlarını ya da başqa şeylər yeyirlər. Banqladeşə gəldikdən sonra onları burada nə gözlədiyini də bilmirlər.
Rohingya qaçqınlarının əksəriyyəti uşaqlardır. Onlar ərzaq çatışmazlığı problemini yaşayır. Yeməyə heç nələri yoxdur. Yanlarından keçərkən çox sayda uşaq, qadın və yaşlıların ac olduqları üçün hönkürtü ilə ağlayarkən gördüm. Nəsə yemək istəyirdilər. Uşaqlar və yaşlı insanlar böyük çətinliklər çəkirdi. Myanmar buddistləri gecə hamının yatdığı vaxt hücum etdikləri üçün uşaqların çoxunun üzərində paltar yox idi. Təkcə canlarının götürüb qaçmışdılar.
Uşaqların çoxu Banqladeşə təkbaşına gəlmişdi. Valideynləri öldürülmüşdü. Kimsəsiz idilər. Əksəriyyəti 3-7 yaşlarında idi. Bir qadın 5 körpə ilə gəlmişdi. Soruşdum ki, bu onun uşaqlarıdır ya yox. O dedi ki onlardan ancaq biri onun uşağıdır, qalan dördü bütün ailəsi Myanma ordusu tərəfindən qətlə yetirilən qardaşının uşaqlarıdır. O, Banqladeşə gələndə digər uşaqlar onun yanına düşüb gəlib. Onlar açıq havada oturmuşdu. Nə yediklərini soruşanda dedi ki, o və uşaqlar son 9 gündə heç bir yeməyib. Banqladeşə gələndə ağacların yarpaqlarını yeyiblər. Banqladeşə çatanda onlara 3 orsalaine və 4 kiçik peçenye paketi veribler. Uşaqlar ac olduqlarına görə ayaq üstə güclə dururdular. Demək olar ki, hamısının vəziyyəti eyni idi. Heç kim düzgün qidalanmır.