Rusiyanın Fövqəladə Hallar Hazirliyi (FHN) Dağlıq Qarabağda yaşayan ermənilərə növbəti humanitar yardımların çatdırılmasını təşkil edib.
Eurasia Diary xəbər verir ki, bu haqda məlumat qurumun saytında yer alıb.
Maraqlıdır ki, rəsmi Moskva ilk dəfə Xankəndi sözünü işlədib. Buna qədər bütün sənədlərdə şəhər Stepanakert kimi göstərilirdi. İndi isə Stepanakertlə bərabər şəhərin əsl adı olan Xankəndi də işlənib.
Bu fakt erməni tərəfinin ciddi narazılığına səbəb olub.
Mənbə yazır ki, sosial infrastrukturun və mənzil fondunun bərpası üçün tikinti materialları avtomobil yolu ilə göndərilib. Ümumilikdə, Xankəndinə (Stepanakert ) təxminən 50 ton yük çatdırılıb. Tərkibində polad, metal plitələr və taxta olub.
Rusiya Fövqəladə Hallar Nazirliyi ötən ilin noyabrından bu yana Dağlıq Qarabağa 1,5 mindən çox humanitar yardım çatdırıb.
Onun köməyi ilə artıq 1,8 min obyekt bərpa edilib. Bunlar çoxmənzilli və özəl yaşayış binaları, inzibati binalar, sosial əhəmiyyətli obyektlər və infrastrukturdur.
Hazırda 300-ə yaxın ərazidə bərpa işləri aparılır. 130 yerli tikinti təşkilatı cəlb edilib. Hər şeydən əvvəl inşaatçılar evlərin damlarını təmir edir, pəncərə və qapılarını dəyişirlər.
