“Xerson şəhəri tam mühasirədədir. Dünən saat 05:00-dan başlayaraq Rusiya hərbi karvanı qərb istiqamətindən şəhərə daxil olub, genişmiqyaslı hücum başlayıb”.
Ednews xəbər verir ki, bu fikirləri Ukrayna Xerson Azərbaycanlıları Diaspor Təşkilatı Ağsaqqallar Şurasının sədri Əlimərdan Kərimov bildirib. O, həmçinin deyib ki, şəhərdə bir məktəb və bir çoxmərtəbəli bina raket zərbəsinə tuş gəlib, hazırda şəhər daxilində döyüşlər gedir.
Şəhərdən təxliyənin təhlükəli olduğunu vurğulayan Ukrayna Xerson Azərbaycanlıları Diaspor Təşkilatı Ağsaqqallar Şurasının sədri azərbaycanlı əhalini evlərində qalmağa çağırdığını söyləyib:
“Əhali minimum müddət üçün ərzaq toplayıb, telefonlar hələ işləyir, elektrik var. Bəzi yerlərdə telefon xətləri qırılıb, ancaq əksər yerlərlə telefon əlaqəmiz var. Ancaq mağazalarda ərzaq məhsulları get-gedə tükənir. Şəhərdə dünən gəzmək mümkün idisə, bu gün artıq çox təhlükəlidir, faktiki mümkünsüzdür. Ona görə də soydaşlarımızı “WhatsApp” qruplarımızda, sosial şəbəkələrdə evlərində qalmağa çağırırıq. Soydaşlarımız arasında yaralanan və həyatını itirənlər yoxdur. Ancaq artıq evdən çıxmaq təhlükəlidir, təhlükəsizlik üçün ilk növbədə evdə qalmaq lazımdır”.
Ə.Kərimov Xersonu tərk etmək üçün müraciət edən soydaşlarımıza da evlərində qalmağı tövsiyə etdiklərini söyləyib:
“Çünki şəhərdən təhlükəsiz çıxış faktiki mümkün deyil”.
Zeynəb Nadirova
.jpg)
