Xəbər verdiyimiz kimi, rus sülhməramlılarıın nəzarət zonasında qalan qondarma və oyuncaq separatçı rejimin nümyəndəsi David Babayan müsahibəsində deyib ki, Azərbaycanın bir hissəsi olmaq bizim üçün qəbuledilməzdir.
Bu barədə Ednews-a açıqlama verən Beynəlxalq Avrasiya Mətbuat Fondunun (BAMF) prezidenti Umud Mirzəyev bildirib ki, separatçılar fərqində deyillər ki, Azərbaycan heç zaman David Babayanlarla bir stol arxasında oturmağı özünə rəva görməz:
"Bunlar özlərinin nə qədər cinayətlərə bulaşdıqlarını çox yaxşı bilirlər. Məsuliyyət məsələsi, haqq-hesab məqamı yaxınlaşmaqdadır. Ona görə də onlar hər vəchlə, David Babayan bütün resurslarını, imkanlarını, bacarıqlarını sərf edərək mümkün dialoqların baş tutmaması üçün çabalar göstərirlər. Hesab edirəm ki, gec-tez dialoq olacaq. Xankəndində yaşayan sağlam qüvvələr öz sözünü deyəcək".
U.Mirzəyevin sözlərinə görə, biz bilirik ki, böyük əksəriyyət təsir altındadır. İnsanların öz mövqeyini bildirməyi, fikirini bildirmək imkanları demək olar yoxdur:
"İnsanlar ona görə də seçim edə bilmirlər. Bu problem də həll yolunu tapacaq. İnanmıram ki, uzun-uzadı bu proses davam etsin. Azərbaycanın dialoq aparması onun daxili işidir. Burada üçüncü, dördüncü tərəflərin iştirakına da lüzum yoxdur. Danışıqlar müsbət yekunlaşmasa separatçılar rədd olub gedəcəklər. Qalanlar ölkə prezidentimizin dediyi kimi, Azərbaycanın vətəndaşlarıdır və vətəndaşlıq qəbuldur. Azərbaycan qanunları ilə yaşayan hər kəslə bizim problemimiz yoxdur".
Oğuz
