Birləşmiş Millətlər Təşkilatının Uşaq Fondu (UNICEF) Sudanda davam edən vətəndaş müharibəsi zamanı uşaqların, hətta körpələrin belə cinsi zorakılığa məruz qaldığını açıqlayıb. Demək olar ki, iki ildir davam edən münaqişədə cinsi zorakılıq geniş şəkildə müharibə silahı kimi istifadə olunur. UNICEF-in hesabatı Sudanda zorlamanın kiçik uşaqlara təsiri ilə bağlı ilk geniş araşdırmadır. Bildirilir ki, rəsmi qeydə alınmış 221 uşaq zorlanma hadisəsinin üçdə biri oğlan uşaqlarına qarşı törədilib. Hesabatda qeyd olunur ki, cəmiyyətin konservativliyi və silahlı qrupların təhdidləri səbəbindən real rəqəmlər qat-qat yüksək ola bilər.

“Sudanda sənədləşdirdiyimiz cinsi zorakılığın miqyası dəhşətlidir”

“EDnews” xəbər verir ki, bu sözləri BMT-nin araşdırma missiyasının rəhbəri Məhəmməd Çande Otman deyib.
Sudandakı vətəndaş müharibəsində ən çox zorakılıq halları Darfur bölgəsində qeydə alınıb. BMT-nin digər araşdırmalarına görə, zorakılıq aktlarının böyük əksəriyyəti Sürətli Dəstək Qüvvələri (RSF) tərəfindən törədilib. Bu silahlı qrupların cinsi zorakılıqdan istifadə etmələri, mülki şəxsləri qorxutmaq və müxalifətə qarşı təzyiq göstərmək məqsədini güdür. BMT-nin hesabatına görə, təxminən 16 qurban 5 yaşından kiçik olub, onlardan dördü körpələrdir. UNICEF, ümumilikdə 221 uşaq zorlanma hadisəsinin qeydə alındığını bildirir, lakin real rəqəmlərin daha yüksək olduğunu vurğulayır.

Təhlükə altında olan qadınlar və uşaqlar
Sudanda yaşanan münaqişə nəticəsində yüz minlərlə insan evlərini tərk etmək məcburiyyətində qalıb. Bu isə qadınları və uşaqları daha da həssas edir. BMT, müharibə zamanı təhsil alan üçdə iki məktəbyaşlı qızın dərsə getmədiyini bildirir.
Bu cür insan hüquqları pozuntuları, həmçinin kömək və tibbi xidmətlərin əhəmiyyətli dərəcədə məhdudlaşması ilə daha da pisləşir.

Fatimə Şükürova//EDnews