ABŞ Mosul şəhərinin İŞİD-dən geri alınmasına kömək məqsədilə məqsədilə İraqa əlavə 600-dən çox hərbçi göndərəcək.
Bunu ABŞ-ın müdafiə naziri Eşton Karter bəyan edib.
“ABŞ İŞİD terror qruplaşması ilə mübarizə məqsədilə, o cümlədən Mosul şəhərinin terrorçulardan azad edilməsi üçün İraqa əlavə 615 hərbçi göndərəcək. Hərbçilər yaxın həftələrdə İraqa yollanacaq”, deyə E.Karter bildirib.
Xatırladaq ki, Mosul şəhəri 10 iyun 2014-cü ildən İŞİD-in nəzarəti altındadır.
Birləşmiş Ştatların hazırda İraqda 4600 nəfərdən ibarət əsgəri qüvvəsi var. Müvəqqəti olaraq ölkədə hərbi qulluqda olan hərbi personal buraya daxil deyil.
İraqın Baş naziri Haydar Əl-Abadinin ofisi ölkənin şimalında Mosul şəhərində İraq qüvvələrinə dəstək məqsədilə Amerikanın təlimatçıları və müşavirlərinin sayının sonuncu dəfə artırılması haqda müraciət etdiyini təsdiqləyib.
BMT hərbi əməliyyatların intensivləşdirilməsi nəticəsində bir milyondan çox insanın məcburi köçkün ola biləcəyi ilə bağlı xəbərdarlıq edib. BMT-nin qaçqınlar agentliyi avqust ayının sonuna qədər təxminən 213 min insanın Mosuldan İraqın müxtəlif yerlərinə qaçdığını bildirib.
Pentaqon eyni zamanda İŞİD döyüşçülərinin Mosulun müdafiəsi zamanı xardal qazından istifadə edə biləcəyi ilə bağlı xəbərdarlıq verib.
İraqın ikinci ən böyük şəhəri kimi tanınan Mosul 2014-cü ildə İŞİD tərəfindən ələ keçirilib və terrorçu qrupun ölkədə istinadgahı olaraq qalır.